ஈரோட்டில் ரூ.1.20 கோடி மோசடி; 16 ஆண்டுகள் தலைமறைவாக இருந்தவர் பெங்களூரில் கைது... என்ன நடந்தது?

சேலத்தைச் சேர்ந்தவர் பிரபாகரன் (51). இவர் ஈரோட்டில் கடந்த 2002-இல் கம்ப்யூட்டர் டேட்டா நிறுவனத்தை நடத்தி வந்தார். முன்பணம் கட்டினால் அதற்கேற்ப டேட்டா வேலை தருவதாகவும், வேலை முடிந்து ஒப்படைத்ததும், செலுத்திய பணத்தை விட இருமடங்கு தருவதாக விளம்பரம் செய்தார். இதை நம்பிய பலரும், கோடிக்கணக்கில் பிரபாகரனிடம் பணம் செலுத்தி கம்ப்யூட்டர் டேட்டா வேலை பெற்று செய்தனர். இந்நிலையில், பிரபாகரன் தலைமறைவானார். பிரபாகரனிடம் பணத்தைக் கொடுத்து ஏமாந்தவர்கள், ஈரோடு டவுன் போலீஸில் புகார் அளித்தனர். இந்த வழக்கு, ஈரோடு சி.பி.சி.ஐ.டி. போலீஸாருக்கு மாற்றப்பட்டது.

சி.பி.சி.ஐ.டி. நடத்திய விசாரணையில் ஈரோட்டில் கம்ப்யூட்டர் டேட்டா ஜாப் ஒர்க் தருவதாக, ஒரு கோடியே 20 லட்சம் ரூபாயை, பிரபாகரன் வசூலித்து மோசடி செய்ததும், அவருடன் கூட்டாளிகளாக ஈரோடு, கொத்துக்காரர் வீதியைச் சேர்ந்த செளந்திரபாண்டியன் (50), பிரபாகரன் மனைவி வண்டார்குழலி (51), சேலம், குமாரகிரிபேட்டை ராஜ்குமார் (49), வீரக்குமார் (எ) வீரமணி (45), சேலம், கிச்சிபாளையத்தை சேர்ந்த அரசேந்திரன் (62) என ஆறு பேர் இணைந்து மோசடியில் ஈடுபட்டது தெரியவந்தது. இவர்கள் சேலம் மாவட்டத்தில் பிசினஸ் சொல்யூசன் பெயரில் நிறுவனம் நடத்தி, மோசடியில் ஈடுபட்டதும் கண்டுபிடிக்கப்பட்டது.

இதைத் தொடர்ந்து, பிரபாகரன், அவரது மனைவி உள்பட ஆறு பேர் மீதும், சி.பி.சி.ஐ.டி போலீஸார் மூன்று பிரிவுகளில் வழக்குப்பதிவு செய்தனர். இந்த வழக்கு ஈரோடு ஜெ.எம்.-3 நீதிமன்றத்தில் நடைபெற்று வந்தது. இதில், பிரபாகரன் மட்டும் 2008 முதல் ஆஜராகாமல் தலைமறைவாக இருந்தார். நீதிமன்றம் பிடியாணை பிறப்பித்தும் அவரைப் பிடிக்க முடியாமல் போலீஸார் திணறி வந்தனர். 16 ஆண்டுகளாக வழக்கு விசாரணைக்கு ஆஜராகாததால், பிரபாகரனை தலைமறைவு குற்றவாளியாக கடந்த செப்டம்பர் மாதம் நீதிமன்றம் அறிவித்தது.

இந்நிலையில், தூத்துக்குடி மாவட்ட சைபர் கிரைம் போலீஸார், வேறொரு வழக்கில் ஒருவரைப் பிடிக்க கர்நாடகா மாநிலம் பெங்களூரு சென்றுள்ளனர். அந்த நபருடன் பிரபாகரன் இருந்துள்ளார். அவரிடம் விசாரித்தபோது, முன்னுக்கு பின் முரணாகப் பதிலளித்துள்ளார்.

இதனால், சந்தேகமடைந்த போலீஸார் பிரபாகரனின் விவரங்களை சோதனை செய்தபோது ஈரோடு, சேலம், நெல்லை, துாத்துக்குடி, சென்னை உள்ளிட்ட பகுதிகளில் பிசினஸ் சொல்யூசன்ஸ் பெயரில் நிறுவனம் நடத்தி, பல கோடி ரூபாய் மோசடி செய்ததும், சி.பி.சி.ஐ.டி.போலீஸாரால் தேடப்பட்டு வருவதும் தெரிந்தது. இதையடுத்து ஈரோடு சி.பி.சி.ஐ.டி., போலீஸாருக்கு தகவல் அளித்தனர். பெங்களூரு சென்ற சி.பி.சி.ஐ.டி. போலீஸார் 16 ஆண்டுகளாக தலைமறைவாக இருந்த பிரபாகரனை கைது செய்து ஈரோட்டுக்கு அழைத்து வந்து நீதிமன்றத்தில் ஆஜர்படுத்தி சிறையில் அடைத்தனர்.

Junior Vikatan-ன் பிரத்யேக Whatsapp Group...

இணைவதற்கு இங்கே க்ளிக் செய்யவும்... https://tinyurl.com/2b963ppb

வணக்கம்,

BIG BREAKINGS முதல்... அரசியல், சமூகம், க்ரைம், சினிமா என அனைத்து ஏரியாக்களின் அசராத அப்டேட்ஸ், ஆழமான கட்டுரைகள்.

ஜூனியர் விகடன் இதழ் மற்றும் டிஜிட்டலில் கவனம் ஈர்க்கும் கட்டுரைகள் இங்கே உடனுக்குடன்...https://tinyurl.com/2b963ppb