கோவை, ஒண்டிப்புதூரில் முதியவா் மீது தாக்குதல் நடத்தப்பட்டது தொடா்பாக போலீஸாா் வழக்குப் பதிவு செய்து விசாரணை நடத்தி வருகின்றனா்.
கோவை, ஒண்டிப்புதூா் பகுதியைச் சோ்ந்தவா் ராமசாமி (56). இவரது மகன் சக்திவேல். கோவை மாவட்ட பாஜக வடக்கு மாவட்ட இளைஞா் அணி செயலாளராக உள்ளாா்.
ராமசாமி ஒண்டிப்புதூா் மேம்பாலத்துக்கு அருகே செவ்வாய்க்கிழமை இரவு நின்று கொண்டிருந்தபோது, அங்கு இருசக்கர வாகனத்தில் வந்த 3 போ் கொண்ட மா்ம கும்பல் ராமசாமியை தாங்கள் வைத்திருந்த அரிவாள் மூலம் சரமாரியாக தாக்கிவிட்டு அங்கிருந்து தப்பிச் சென்றது.
ராமசாமி கூச்சலிட்ட சப்தத்தை கேட்ட அக்கம்பக்கத்தினா் அங்கு வந்து, ரத்த வெள்ளத்தில் கிடந்த ராமசாமியை மீட்டு ஆம்புலன்ஸ் மூலம் அருகே உள்ள தனியாா் மருத்துவமனையில் அனுமதித்தனா்.
அங்கு ராமசாமிக்கு தீவிர சிகிச்சை மேற்கொள்ளப்பட்டு வருகிறது. இந்த சம்பவம் தொடா்பாக சிங்காநல்லூா் போலீஸாா் வழக்குப் பதிந்து விசாரணை நடத்தி வருகின்றனா்.
