கட்சித் தொடங்கியதும் ஆட்சிக்கு வரத் துடிக்கிறார்கள்: யாரைச் சொல்கிறார் மு.க. ஸ்டாலின்?

சென்னை: கட்சித் தொடங்கியதுமே ஆட்சிக்கு வரத் துடிக்கிறார்கள் என்று தமிழக முதல்வரும் திமுக தலைவருமான மு.க. ஸ்டாலின் மறைமுகமாகப் பேசியுள்ளார்.

ஒரே நேரத்தில் மாற்றுக் கட்சியைச் சேர்ந்த 3,000 பேர் திமுகவில் இணையும் நிகழ்ச்சி, சென்னை அறிவாலயத்தில் இன்று பிரமாண்டமாக நடைபெற்றது. காலை முதலே ஆயிரக்கணக்கானோர் அண்ணா அறிவாலயத்தில் குவிந்தனர். மாற்றுக் கட்சியிலிருந்து திமுகவில் இணைந்தவர்களுக்கு திமுக துண்டைப் போர்த்தி, திமுக தலைவர் மு.க. ஸ்டாலின் அவர்களுக்கு உறுப்பினர் அட்டையை வழங்கினார்.

பிறகு மாற்றுக் கட்சியினரை வரவேற்றுப் பேசிய தமிழக முதல்வர் மு.க. ஸ்டாலின், திமுகவில் சேர்ந்தவர்களுக்கு திமுகவில் சேர்வதற்கு ஆயிரக்கணக்கானோர் காத்திருக்கிறார்கள். திராவிட மாடல் ஆட்சி என்றால் சிலருக்குக் கோபம் வருகிறது.

திமுக ஒன்றும் நேற்று முளைத்த காளான் அல்ல என்றும், கட்சித் தொடங்கியதுமே ஆட்சிக்கு வரத் துடிக்கிறார்கள். யாரையும் குறிப்பிட்டு அடையாளம் காட்ட விரும்பவில்லை. யாரையும் குறிப்பிட்டுச் சொல்லி இந்த மேடையின் கௌரவத்தை நான் குறைக்கவிரும்பவில்லை. நாட்டுக்காக உழைப்பது போல நாடகம் ஆடுபவர்கள் இருக்கிறார்கள். அவதூறாக பேசுபவர்களை மக்கள் புரிந்து கொள்வார்கள். அவர்களுக்கு ஆதரவளிக்க மாட்டார்கள் என்றும் முதல்வர் கூறினார்.

மேலும், பேசுகையில், நேற்று கட்சித் தொடங்கியவர்கள் கூட, தேர்தலில் நின்று வெற்றி பெற்று முதல்வராவோம் என பேசுகிறார்கள். ஏழைகளுக்குத் தொண்டாற்றத் தொடங்கியதுதான் திமுக, தமிழகத்துக்குத் தொண்டாற்றத் தொடங்கியது திமுக. இங்கே இணைபவர்கள், தாங்கள் முன்பிருந்த கட்சியின் பெயரைக்கூட சொல்ல விரும்பவில்லை என்றும் பேசியுள்ளார்.

மக்களுக்கு இந்த ஆட்சியின் சாதனைகளை நினைவுபடுத்தினாலே போதும். ஆட்சியின் சாதனைகளால் 200 அல்ல 234 தொகுதிகளிலும் நாம் வெற்றி பெறலாம் என்று கூறியுள்ளார் ஸ்டாலின்.