காா் கட்டுப்பாட்டை இழந்து விபத்து: 4 போ் பலத்த காயம்!

திருச்சியில் ஞாயிற்றுக்கிழமை நள்ளிரவு காா் கட்டுப்பாட்டை இழந்து சாலை மையத் தடுப்பில் மோதியதில் 4 போ் பலத்த காயமடைந்தனா்.

திருச்சியில் ஞாயிற்றுக்கிழமை நள்ளிரவு மத்திய பேருந்து நிலையத்திலிருந்து ஜங்சன் வழியாக தலைமை அஞ்சலகம் நோக்கி காா் ஒன்று ஒன்று புறப்பட்டது. அந்தக் காரில் 4 இளைஞா்கள் இருந்தனா்.

காா் கண்டோன்மென்ட் பாரதியாா் சாலையில் ஜங்ஷன் அருகே சென்றபோது, ஓட்டுநரின் கட்டுப்பாட்டை இழந்து சாலையின் மையத் தடுப்பில் மோதி விபத்துக் குள்ளானது.

இதில் காரின் முன்பகுதி நொறுங்கி காரில் இருந்த இளைஞா்களுக்கு பலத்த காயம் ஏற்பட்டது. இதையடுத்து அனைவரும் காரிலேயே மயங்கி சரிந்தனா். இதைக் கண்ட அக்கம்பக்கத்தினா் 4 பேரையும் மீட்டு ஆம்புலன்ஸ் மூலம் சிகிச்சைக்காக திருச்சி அரசு மருத்துவமனைக்கு அனுப்பிவைத்தனா்.

இந்த விபத்து குறித்து தகவல் அறிந்த திருச்சி மாநகரப் போக்குவரத்துப் புலனாய்வு தெற்கு பிரிவு போலீஸாா் சம்பவ இடத்திற்கு சென்று விசாரணை நடத்தி வருகின்றனா்.

இந்த சம்பவத்தால் அந்த பகுதியில் சிறிது நேரம் பரபரப்பு ஏற்பட்டது. காயமடைந்தவா்கள் குறித்த விபரங்கள் உடனடியாக தெரியவில்லை.