கிறிஸ்தவ அமைப்புகளின் சட்டவிரோத நடவடிக்கைகளை கட்டுப்படுத்த தனிச் சட்டம் அவசியம்: உயா்நீதிமன்றம்

கிறிஸ்தவ அமைப்புகளின் சட்டவிரோத நடவடிக்கைகளைக் கட்டுப்படுத்த தனிச் சட்டம் கொண்டு வர வேண்டுமென சென்னை உயா்நீதிமன்ற மதுரை அமா்வு அண்மையில் உத்தரவிட்டது.

திருநெல்வேலி தமிழ் பாப்பிஸ்ட் (ஸ்ட்ரிக்ட்) அறக்கட்டளை சபை செயலா் பெஞ்சமின் பிராங்கிளின் சென்னை உயா்நீதிமன்ற மதுரை அமா்வில் தாக்கல் செய்த மேல்முறையீட்டு மனு:

கோவில்பட்டியில் திருநெல்வேலி தமிழ் பாப்பிஸ்ட் (ஸ்டிரிக்ட்) அறக்கட்டளை சபை செயல்பட்டு வருகிறது. இந்தச் சபையின் நிா்வாகக் குழுவில் இடம் பெற்றிருந்த ஸ்டீபன் அம்புரோஸ் உள்பட பலா் முறைகேட்டில் ஈடுபட்டதால், அவா்கள் நிா்வாகக் குழுவிலிருந்து நீக்கப்பட்டனா்.

இந்த நிலையில், ஸ்டீபன் அம்புரோஸ் தமிழ் பாப்பிஸ்ட் மிஷன் சங்கம் என்ற பெயரில் தனிச் சபையைத் தொடங்கினாா். இதற்கு எதிராக உரிமையியல் நீதிமன்றத்தில் வழக்குத் தொடுத்தோம்.

எங்களது சபைக்குச் சொந்தமான கோவில்பட்டி மந்திப்புதோப்பு சாலையில் உள்ள தேவாலயம், பல்வேறு கட்டடங்கள் உள்ள 4.54 ஏக்கா் சொத்துகள், புது சாலையில் உள்ள தேவாலயம், கட்டடம் உள்ள 18.5 சென்ட் சொத்துகளை வருவாய் ஆவணங்களிலிருந்து ஆசிா் தம்பிராஜ் (ஸ்டீபன் அம்புரோஸ் மகன்) தமிழ் பாப்பிஸ்ட் மிஷன் சங்கம் பெயருக்கு மாற்றம் செய்து, கோவில்பட்டி சிறப்பு வட்டாட்சியா் உத்தரவிட்டாா். இதை ரத்து செய்யக் கோரி தாக்கல் செய்த மனுவை தனி நீதிபதி தள்ளுபடி செய்தாா். தனி நீதிபதியின் உத்தரவை ரத்து செய்து உத்தரவிட வேண்டும் என அவா் கோரியிருந்தாா்.

இந்த மனு அண்மையில் விசாரித்த உயா்நீதிமன்ற நீதிபதிகள் பி. வேல்முருகன், கே.கே. ராமகிருஷ்ணன் அமா்வு அண்மையில் பிறப்பித்த உத்தரவு:

கிறிஸ்தவ அமைப்புகளுக்குச் சொந்தமான சொத்துகளை சிலா் மோசடி செய்கின்றனா். இந்த மோசடியானது நாடு முழுவதும் நடைபெறுகிறது. கிறிஸ்தவ அமைப்புகளை நிா்வகிப்பவா்கள், அந்த அமைப்புகளின் சொத்துகளை சட்டவிரோதமாக விற்பனை செய்வது நீதிமன்றத்தின் கவனத்துக்கு வந்திருக்கிறது.

ஏழை மக்களின் முன்னேற்றத்துக்காகவும், வறுமைக் கோட்டுக்கு கீழ் உள்ளவா்களுக்கு உதவி செய்வதற்காகவும் இந்த அமைப்புகளின் பெயா்களில் ஏராளமான சொத்துகள் வாங்கப்பட்டன. இவற்றில் ஒரு லட்சம் கோடி ரூபாய் மதிப்புக்கும் அதிகமான சொத்துகள் சட்டவிரோத ஆக்கிரமிப்பில் உள்ளன.

இந்து, இஸ்லாமிய அமைப்புகளின் சொத்துகளைக் கட்டுப்படுத்த இந்து சமய அறநிலையத் துறை சட்டம், வக்ஃப் வாரிய சட்டம் உள்ளன. இதேபோல, கிறிஸ்தவ அமைப்புகளின் சொத்துகளை முறைகேடாகப் பயன்படுத்ததைத் தடுக்க நடவடிக்கை எடுக்கும் கடமை மத்திய அரசுக்கு உண்டு.

எனவே, கிறிஸ்தவ அமைப்புகளின் நிா்வாகிகளின் சட்டவிரோத நடவடிக்கைகளைக் கட்டுப்படுத்த தனிச் சட்டம் கொண்டு வரவும், கிறிஸ்தவ நிறுவனங்களின் சொத்துகளை நீதிமன்ற அனுமதி பெறாமல், பதிவு செய்யக் கூடாது என பதிவுத் துறை சட்டத்தில் உரிய திருத்தம் கொண்டு வரவும் நடவடிக்கை எடுக்க வேண்டும்.

இந்த வழக்கில் தனி நீதிபதி பிறப்பித்த உத்தரவு ரத்து செய்யப்படுகிறது. வருவாய் ஆவணங்களில் மாற்றம் செய்த கோவில்பட்டி சிறப்பு வட்டாட்சியா் பிறப்பித்த உத்தரவும் ரத்து செய்யப்படுகிறது. வருவாய் ஆவணங்களில் சம்பந்தப்பட்ட சொத்துகள் மனுதாரா் சபைக்குச் சொந்தமானது என மாற்றம் செய்ய வேண்டும். இந்த மோசடிக்காக கோவில்பட்டி சிறப்பு வட்டாட்சியா், தமிழ் பாப்பிஸ்ட் மிஷன் சா்ச் அறக்கட்டளைச் செயலருக்கு தலா ஒரு லட்சம் ரூபாய் அபராதம் விதிக்கப்படுகிறது என்றனா் நீதிபதிகள்.