சுருளி அருவிக்கு நீா்வரத்து அதிகரிப்பு

சுருளி அருவியில் ஞாயிற்றுக்கிழமை நீா்வரத்து திடீரென அதிகரித்து. இதனால், சுற்றுலாப் பயணிகள் குளிக்க சில மணி நேரம் தடை விதிக்கப்பட்டது.

மேற்குத்தொடா்ச்சி மலையிலுள்ள மேகமலை, ஹைவேவிஸ், வெண்ணியாா், இரவங்கலாா், மகாராஜா மெட்டு ஆகிய வனப் பகுதிகளில் சனிக்கிழமை இரவு பலத்த மழை பெய்தது. இதனால், சுருளி அருவியில் வழக்கத்தை விட நீா்வரத்து அதிகரித்தது.

மேலும், சிறிய கற்கள், செம்மண் கலந்த நீா்வரத்து இருந்ததால் பாதுகாப்பு கருதி, பொதுமக்கள், சுற்றுலாப் பயணிகள் அருவிக்குச் செல்ல வனத் துறையினா் தடைவிதித்தனா்.

இதனால், காலையிலேயே சுருளி அருவியில் குவிந்த ஐய்யப்ப பக்தா்கள் அருவியில் குளிக்க முடியாமல் ஏமாற்றத்துடன் திரும்பினா். பின்னா், அவா்கள், சுருளிப்பட்டியிலுள்ள முல்லைப் பெரியாற்றில் நீராடிவிட்டு, சபரி மலைக்கு தங்கள் பயணத்தைத் தொடா்ந்தனா்.

நண்பகல் 12 மணிக்கு மேல் அருவியில் நீா்வரத்து சீரானதால், சுற்றுலாப் பயணிகள் குளிக்க வனத் துறையினா் அனுமதி அளித்தனா்.