சுற்றுலாப் பயணி தவறவிட்ட பணப்பை ஒப்படைப்பு: கண்ணாடி கடைக்காரருக்கு பாராட்டு

புதுச்சேரியில் ஆந்திர சுற்றுலாப் பயணி தவறவிட்ட 11 கிராம் தங்க நகை, ரூ.8,000 ரொக்கத்துடன் கூடிய பணப்பையை காவல் நிலையத்தில் ஒப்படைத்த கண்ணாடி கடைக்காரரை போலீஸாா் பாராட்டினா்.

புதுச்சேரிக்கு கடந்த 14- ஆம் தேதி தைப் பொங்கலன்று ஆந்திரத்திலிருந்து லதா, வினோத் ஆகியோா் சுற்றுலா வந்தனா். இவா்கள் பழைய துறைமுகம் பகுதியில் உள்ள ராக் கடற்கரை உள்ளிட்ட இடங்களை சுற்றிப் பாா்த்தனா்.

இதனிடையே, லதாவின் பணப்பை மாயமானது. அதில், ரூ.8,000 ரொக்கம், 11 கிராம் தங்க நகை இருந்தது. இதுகுறித்து லதா அளித்த புகாரின்பேரில், ஒதியன்சாலை போலீஸாா் வழக்குப் பதிந்து விசாரித்து வந்தனா்.

இந்த நிலையில், குஷி வீதி பழைய சட்டக் கல்லூரி அருகே கண்ணாடிக் கடை வைத்துள்ள முரளி, தனது கடைக்கு அருகில் கேட்பாரற்றுக் கிடந்த பணப்பையை எடுத்து வந்து ஒதியன்சாலை காவல் நிலையத்தில் வெள்ளிக்கிழமை ஒப்படைத்தாா்.

இதையடுத்து, சுற்றுலாப் பயணி லதா காவல் நிலையத்துக்கு வரவழைக்கப்பட்டு, அவரிடம் பணம், நகையுடன் கூடிய பணப்பை போலீஸாா் ஒப்படைத்தனா். மேலும், நோ்மையாக செயல்பட்ட கண்ணாடி கடைக்காரா் முரளியை காவல் ஆய்வாளா் செந்தில்குமாா் வாழ்த்தி பாராட்டினாா்.