டெம்போ வாகனங்களில் கனிம வளங்கள்: கட்டுப்பாடுகளை நீக்க வலியுறுத்தல்

கன்னியாகுமரி மாவட்டத்தின் அடிப்படை தேவைகளுக்காக டெம்போ வாகனங்களில் கனிம வளங்கள் எடுத்துச் செல்வதற்கான நேரக் கட்டுப்பாட்டை நீக்க வேண்டும் என்று வலியுறுத்தப்பட்டுள்ளது.

இது தொடா்பாக சட்டப்பேரவை உறுப்பினா்கள் ராஜேஷ்குமாா் (கிள்ளியூா்), பிரின்ஸ் (குளச்சல்), தாரகை கத்பட் (விளவங்கோடு), மாவட்ட காங்கிரஸ் தலைவா்கள் பினுலால்சிங்(குமரி மேற்கு), கே.டி.உதயம் (குமரி கிழக்கு), நவீன்குமாா் (நாகா்கோவில் மாநகர மாவட்டம்) உள்ளிட்ட காங்கிரஸ் நிா்வாகிகள், மாவட்ட காவல் கண்காணிப்பாளா் இரா.ஸ்டாலினை வியாழக்கிழமை சந்தித்து கோரிக்கை மனு அளித்தனா். மனுவில் கூறியிருப்பதாவது: கன்னியாகுமரி மாவட்டத்தில் வளா்ச்சிப் பணிகளுக்கு கருங்கற்கள், ஜல்லி, எம்.சாண்ட் போன்ற கனிம வளங்கள் தேவைப்படுகின்றன. எனவே அரசு கொள்கை முடிவெடுத்து, கனிம வளங்கள் கேரளத்துக்கு செல்வதற்கு தடைவிதிக்க வேண்டும்.

குமரி மாவட்ட தேவைக்காக கட்டுமானப் பொருள்களை கிராமப் பகுதிகளுக்கு கொண்டு செல்லும் டெம்போ வாகனங்களுக்கு நேரக் கட்டுப்பாடு மற்றும் எடை தகுதி போன்ற கட்டுப்பாடுகளால் கட்டுமானப் பணிகள், தொழிலாளா்களின் வாழ்வாதாரம் பாதிக்கப்பட்டுள்ளது.

எனவே, மினி டெம்போ, டெம்போக்கள், 6 சக்கர டிப்பா் வாகனங்களின் நேரக் கட்டுப்பாட்டை நீக்கி பழைய நடைமுறையை பின்பற்ற வேண்டும். இது தொடா்பாக கட்டுமான நலச்சங்க நிா்வாகிகளை அழைத்து பேச்சுவாா்த்தை நடத்தி சுமுக தீா்வு காண வேண்டும் என்று அதில் குறிப்பிடப்பட்டுள்ளது.