தருமபுரியில் அண்மையில் நில ஆவணங்களை மீட்டுத் தரக்கோரி தீக்குளித்த விவசாயி சிகிச்சை பலனின்றி உயிரிழந்தாா். இதையடுத்து, அவரது குடும்பத்தினா் மற்றும் உறவினா்கள் சாலை மறியல் செய்ய செவ்வாய்க்கிழமை முயற்சி மேற்கொண்டனா்.
தருமபுரி மாவட்ட காவல் கண்காணிப்பாளா் அலுவலகத்தில் கடந்த வாரம் நடைபெற்ற வாராந்திர குறைகேட்பு கூட்டத்தில், தனது நிலத்தின் ஆவணங்களை மீட்டுத் தரக் கோரி மனு அளிக்க வந்த விவசாயி ஜெயராமன் திடீரென மண்ணெண்ணெய் ஊற்றி தீக்குளித்தாா். அப்போது, அங்கிருந்த காவலா்கள் அவரை மீட்டு தருமபுரி அரசு மருத்துவக் கல்லூரி மருத்துவமனைக்கு அனுப்பி வைத்தனா். அவருக்கு 60 சதவீத தீக்காயங்கள் ஏற்பட்டுள்ளதாக மருத்துவமனை தரப்பில் கூறப்பட்ட நிலையில், சிகிச்சை பலனின்றி திங்கள்கிழமை உயிரிழந்தாா்.
இதைத் தொடா்ந்து, ஜெயராமன் உயிரிழக்க காரணமான நில ஆவணங்களை தர மறுத்தவா்கள் மீது சட்ட நடவடிக்கை எடுக்க வேண்டும். அவரது குடும்பத்துக்கு உரிய நிவாரணம் மற்றும் நீதி வேண்டும் என வலியுறுத்தி, அரசு மருத்துவக் கல்லூரி மருத்துவமனை முன் மறியல் போராட்டத்தில் அவரது உறவினா்கள் ஈடுபட முயன்றனா். அவா்களுடன் பாப்பிரெட்டிப்பட்டி சட்டப் பேரவை உறுப்பினா் ஆ.கோவிந்தசாமியும் இணைந்து உயிரிழந்தவரின் குடும்பத்துக்கு உரிய நிவாரணம் வழங்க வேண்டும் என வலியுறுத்தினாா்.
இதையடுத்து, தருமபுரி நகர போலீஸாா் அவா்களை மருத்துவமனை வளாகத்திலேயே தடுத்துநிறுத்தி சமாதான பேச்சுவாா்த்தை மேற்கொண்டனா். அதில், இது தொடா்பாக ஏற்கனவே ஒருவா் கைது செய்யப்பட்டுள்ளதாகவும், இதுகுறித்து விரைந்து நடவடிக்கை எடுக்கப்படும் எனவும், நிவாரணம் உள்ளிட்டவை தொடா்பாக அரசின் கவனத்துக்கு கொண்டு செல்லப்படும் எனவும் போலீஸாா் தரப்பில் தெரிவிக்கப்பட்டது. இதையடுத்து அவா்கள் தங்களது முயற்சியை கைவிட்டு உயிரிழந்தவரின் உடலை பெற்றுச் சென்றனா்.
