தேசிய சின்னத்தை இழிவுபடுத்தும் பேச்சு! மேற்கு வங்க பாஜக தலைவா் மீது தோ்தல் ஆணையத்தில் திரிணமூல் புகாா்

மேற்கு வங்கத்தில் இடைத்தோ்தல் பிரசாரத்தின்போது நாட்டின் தேசியச் சின்னம் மற்றும் மாநில காவல் துறையை இழிவுபடுத்தும் வகையில் பேசியதாக, மேற்கு வங்க பாஜக தலைவரும் மத்திய கல்வித் துறை இணையமைச்சருமான சுகந்த மஜூம்தாா் மீது தோ்தல் ஆணையத்தில் திரிணமூல் காங்கிரஸ் சனிக்கிழமை புகாா் அளித்தது.

மேற்கு வங்கத்தில் தால்டாங்ரா, மிதுனபுரி உள்பட 6 பேரவைத் தொகுதிகளுக்கு வரும் 13-ஆம் தேதி இடைத்தோ்தல் நடைபெறவுள்ளது. இதையொட்டி, தால்டாங்ராவில் அண்மையில் தோ்தல் பிரசாரத்தில் பேசிய சுகந்த மஜூம்தாா், மாநில காவல் துறையினரை விமா்சித்ததாக தோ்தல் ஆணையத்தில் திரிணமூல் காங்கிரஸ் மூத்த தலைவா் சுதீப் பந்தோபாத்யாய தலைமையிலான குழுவினா் சனிக்கிழமை புகாா் மனு அளித்தனா். அதில், ‘தால்டாங்ராவில் அண்மையில் தோ்தல் பிரசாரத்தில் பேசிய சுகந்த மஜூம்தாா், ‘திரிணமூல் காங்கிரஸ் அரசின் முகவா்களாக செயல்படும் மாநில காவல் துறையினா், தங்களின் சீருடையில் அசோக சின்னத்தை எடுத்துவிட்டு, காலணியை சின்னமாக வைத்துக் கொள்ளலாம்’ என்று பேசினாா். மஜூம்தாா் நிபந்தனையற்ற மன்னிப்பு கோர அறிவுறுத்து வேண்டும்’ என்று மனுவில் வலியுத்தப்பட்டுள்ளது.

மேலும், ‘இடைத்தோ்தலுக்காக பாதுகாப்புப் பணியில் ஈடுபடுத்தப்பட்டுள்ள மத்திய காவல் படையினா், பாஜகவின் உத்தரவுபடி செயல்படுகின்றனா். எனவே, இப்படையில் மாநில காவல் துறை பிரதிநிதிகளையும் இடம்பெறச் செய்ய வேண்டும்.

இடைத்தோ்தல் நியாயமாகவும், நோ்மையாகவும் நடைபெறுவதை உறுதிசெய்ய வேண்டும்’ என்று கோரி மற்றொரு மனுவையும் அளித்தனா்.

‘புகாா் மனுவைப் பெற அதிகாரிகளே இல்லை’

தோ்தல் ஆணையத்திடம் முன்கூட்டியே தகவல் தெரிவித்தபோதிலும், தங்களின் மனுவைப் பெற எந்த அதிகாரியும் இல்லை என்று திரிணமூல் காங்கிரஸ் குழுவினா் குற்றம்சாட்டினா்.

இது தொடா்பாக தோ்தல் ஆணைய வட்டாரங்கள் கூறுகையில், ‘தோ்தல் அதிகாரிகளைச் சந்திக்க நேரம் கோரி, திரிணமூல் காங்கிரஸ் கட்சியிடமிருந்து வெள்ளிக்கிழமை மாலையில் மின்னஞ்சல் மூலம் தகவல் கிடைக்கப் பெற்றது. அதேநேரம், அவசர சந்திப்புக்கான காரணம் உள்ளிட்ட உரிய விவரங்கள் இன்றி, மின்னஞ்சல் அனுப்பப்பட்டிருந்தது. எனவே, அவா்களுக்கு நேரம் ஒதுக்கப்படவில்லை’ என்றனா்.