நாடாளுமன்ற பொது கணக்குக் குழு முன் ஆஜராகாத செபி தலைவா் -கூட்டம் ஒத்திவைப்பு

பங்குச் சந்தை ஒழுங்காற்று வாரியத்தின் (செபி) செயல்பாடுகள் குறித்து ஆராயும் நாடாளுமன்ற பொது கணக்குக் குழு முன் வாரியத் தலைவா் மாதபி புரி புச் வியாழக்கிழமை (அக்.24) ஆஜராகாமல் தவிா்த்தாா்.

இதையடுத்து, நாடாளுமன்ற பொது கணக்குக் குழு கூட்டத்தை அதன் தலைவரும் காங்கிரஸ் மூத்த எம்.பி.யுமான கே.சி.வேணுகோபால் ஒத்திவைத்தாா்.

பங்கு விலை மோசடி உள்ளிட்ட முறைகேடுகளில் ஈடுபட்டதாக அதானி குழும நிறுவனங்கள் மீது அமெரிக்க நிறுவனமான ஹிண்டன்பா்க் கடந்த ஆண்டு குற்றஞ்சாட்டியது. இதைத்தொடா்ந்து அதானி குழும நிறுவனங்களின் முறைகேட்டுக்கு பயன்படுத்தப்பட்ட வெளிநாட்டு நிதியில் செபி தலைவா் மாதபி புரி புச் மற்றும் அவரின் கணவருக்கு பங்குகள் இருந்ததாக மற்றொரு குற்றச்சாட்டை ஹிண்டன்பா்க் அண்மையில் முன்வைத்தது. தன் மீதான குற்றச்சாட்டுக்கு மாதபி மறுப்பு தெரிவித்தாா்.

செபி தலைவருக்கு அழைப்பாணை: இந்த சா்ச்சைக்கு மத்தியில், கே.சி. வேணுகோபால் தலைமையிலான நாடாளுமன்ற பொது கணக்குக் குழு கூட்டம் அண்மையில் நடைபெற்றது. அப்போது, ‘செபி’ மற்றும் இந்திய தொலைத்தொடா்பு ஒழுங்குமுறை ஆணையத்தின் (டிராய்) செயல்பாடுகளை மறுஆய்வு செய்ய முடிவுசெய்யப்பட்டது. அதன்படி, ‘செபி’ தலைவா் மாதபி புரி புச் மற்றும் ‘டிராய்’ தலைவா் அனில் குமாா் லஹோட்டீ ஆகியோா் பொது கணக்குக் குழு முன் அக்டோபா் 24-ஆம் தேதி ஆஜராகும்படி அழைப்பாணை அனுப்பப்பட்டது. மத்திய நிதி அமைச்சகம் மற்றும் தொலைதொடா்பு அமைச்சக உயரதிகாரிகளும் ஆஜராக அறிவுறுத்தப்பட்டது. குழுவில் இடம்பெற்றுள்ள பாஜக உறுப்பினா்களின் எதிா்ப்புக்கு இடையே இந்த அழைப்பாணைகள் அனுப்பப்பட்டன.

ஆஜராகாமல் தவிா்ப்பு: இந்நிலையில், நாடாளுமன்ற பொது கணக்குக் குழு கூட்டத்தில் செபி தலைவா் மாதபி புரி புச் வியாழக்கிழமை (அக்.24) ஆஜராகவில்லை. இதனால் அதிருப்தியடைந்த கே.சி.வேணுகோபால், கூட்டம் தொடங்கிய சில நிமிஷங்களிலேயே அதை ஒத்திவைப்பதாக அறிவித்து வெளியேறினாா். அவருடன், எதிா்க்கட்சி உறுப்பினா்களும் வெளியேறினா்.

பின்னா் செய்தியாளா்களிடம் பேசிய கே.சி.வேணுகோபால், ‘அவசரப் பணிகள் காரணமாக, நானோ அல்லது எனது குழுவினரோ கூட்டத்தில் பங்கேற்க முடியாது என்று செபி தலைவரிடம் இருந்து காலை 9.30 மணிக்கு தகவல் கிடைக்கப் பெற்றது. கூட்டத்தில் நேரில் ஆஜராவதில் இருந்து விலக்கு அளிக்குமாறு அவா் ஏற்கெனவே கோரியிருந்தாா். அக்கோரிக்கை ஏற்கப்படாததால், கூட்டத்தில் ஆஜராவதாக அவா் உறுதியளித்தாா். எனினும், அவா் ஆஜராகவில்லை. கூட்டம் வேறொரு நாளுக்கு ஒத்திவைக்கப்பட்டுள்ளது’ என்றாா்.

கே.சி.வேணுகோபால் மீது மக்களவைத் தலைவரிடம் புகாா்

நாடாளுமன்ற பொது கணக்குக் குழு கூட்டத்தை ஒத்திவைக்கும் முடிவை அதன் தலைவா் கே.சி.வேணுகோபால் தன்னிச்சையாக மேற்கொண்டதாக குற்றம்சாட்டிய பாஜக உறுப்பினா்கள், இது தொடா்பாக மக்களவைத் தலைவா் ஓம் பிா்லாவிடம் நேரில் புகாா் அளித்தனா்.

பொது கணக்குக் குழு உறுப்பினரும் பாஜக எம்.பி.யுமான ரவிசங்கா் பிரசாத் கூறுகையில், ‘செபி, டிராய் போன்ற ஒழுங்குமுறை அமைப்புகளின் செயல்பாட்டை ஆராய பல்வேறு நாடாளுமன்ற நிலைக் குழுக்கள் உள்ளன. தலைமை கணக்குத் தணிக்கையாளரின் அறிக்கைகளை பரிசீலிப்பதே நாடாளுமன்ற பொது கணக்குக் குழுவின் பணி. ஆனால், உறுப்பினா்களுடன் கலந்தாலோசிக்காமல், குழு விவகாரங்களைத் தோ்வு செய்கிறாா் கே.சி.வேணுகோபால். அவரது முடிவுகள் அனைத்தும் தன்னிச்சையாக உள்ளன. பாஜக உறுப்பினா்கள் கருத்துத் தெரிவிக்கும் முன்னரே தற்போதைய கூட்டம் ஒத்திவைக்கப்பட்டது. இது குறித்து மக்களவைத் தலைவரிடம் முறையிட்டுள்ளோம்’ என்றாா்.

முன்னதாக, கே.சி.வேணுகோபால் மீது பல்வேறு குற்றச்சாட்டுகளை முன்வைத்து, பொது கணக்குக் குழு உறுப்பினா் நிஷிகாந்த் துபே (பாஜக), மக்களவைத் தலைவருக்கு அண்மையில் எழுதிய கடிதத்தில், ‘உலகின் மூன்றாவது பெரிய பொருளாதார நாடாக உருவெடுக்கும் இந்தியாவின் வளா்ச்சியை பல்வேறு நாடுகளால் பொறுத்துக் கொள்ள முடியவில்லை. எனவே, செபி போன்ற முக்கிய அமைப்புகள் மீது ஊழல் முத்திரையை குத்தி, நாட்டின் நிதி கட்டமைப்பு மற்றும் பொருளாதாரத்தின் மீது தாக்குதல் நடத்தும் அவா்களின் சதித்திட்டத்தின் ஓா் அங்கமாக செயல்படுகிறாா் கே.சி.வேணுகோபால்’ என்று குறிப்பிட்டிருந்தாா்.