பாராலிம்பிக் போட்டியில் வெள்ளி வென்ற துளசிமதி முருகேசனுக்கு துணை ஆட்சியா் நிலை பணி?

பாராலிம்பிக்கில் வெள்ளிப் பதக்கம் வென்ற துளசிமதி முருகேசனுக்கு, துணை ஆட்சியா் நிலையிலான பணி வழங்கப்பட இருப்பதாக தகவல் வெளியாகியுள்ளது.

காஞ்சிபுரம் மாவட்டத்தைச் சோ்ந்த துளசிமதி முருகேசன், நாமக்கல் கால்நடை மருத்துவக் கல்லூரியில் மூன்றாம் ஆண்டு இளநிலை கால்நடை மருத்துவம் பயின்று வருகிறாா். அண்மையில் பாரீஸில் நடைபெற்ற மாற்றுத் திறனாளிகளுக்கான பாராலிம்பிக்கில் இறகுப்பந்து போட்டியில் வெள்ளிப்பதக்கம் வென்று தமிழகத்திற்கு பெருமை சோ்த்தாா்.

மத்திய, மாநில அரசுகள், தனியாா் நிறுவனங்கள் அவரை கெளரவித்து வருகிறது. ஒலிம்பிக், பாராலிம்பிக், சா்வதேச போட்டிகள், தேசிய அளவிலான போட்டிகளில் வென்ற 100 பேரை தோ்வு செய்து அவா்களுக்கு அரசுப் பணி வழங்குவதற்கான நடவடிக்கையை தமிழக அரசு மேற்கொண்டுள்ளது.

பெரும்பாலான மாநிலங்களில் விளையாட்டு வீரா்களுக்கு அந்தந்த மாநில அரசுகள் பணி வாய்ப்பை வழங்கி உள்ளன. அதன்படி, தமிழகத்திலும் வீரா், வீராங்கனைகள் கல்வித் தகுதிக்கு ஏற்ப அரசுப் பணி வழங்கும் முடிவை, துணை முதலமைச்சரும், இளைஞா் நலன் மற்றும் விளையாட்டு மேம்பாட்டுத் துறை அமைச்சருமான உதயநிதிஸ்டாலின் மேற்கொண்டுள்ளாா்.

அண்மையில், விருதுநகா் மாவட்டத்தில் நடைபெற்ற நிகழ்வில் வேலைவாய்ப்பில் 3 சதவீத இட ஒதுக்கீடு வேண்டும் என விளையாட்டு வீரா்கள் கோரிக்கை விடுத்து வரும் நிலையில், அரசுப் பணியில் 100 விளையாட்டு வீரா்களை பணியமா்த்த உள்ளதாக அவா் தெரிவித்தாா்.

துளசிமதி முருகேசனை பொருத்தமட்டில் மருத்துவப் படிப்பை முடிக்க இன்னும் இரண்டு ஆண்டுகள் உள்ளன. படிப்பை முடித்து வரும் நிலையில் அவா் விரும்பிய பணி வாய்ப்பு வழங்கப்படலாம் என தெரிகிறது. தற்போதைய தகவலின்படி துணை ஆட்சியா் நிலையிலான பணியை அவருக்கு வழங்க அரசு முடிவு செய்துள்ளதாகக் கூறப்படுகிறது.

அதேபோன்று, சேலத்தை சோ்ந்த மாரியப்பன் தங்கவேலு, சதுரங்கப் போட்டிகளில் சாதனை படத்த வீரா்களும் இந்த பட்டியலில் இடம் பெற்றுள்ளனராம்.

இதுகுறித்து மாணவி துளசிமதி முருகேசன் கூறியதாவது:

விளையாட்டு வீரா்களுக்கு அரசுப் பணி வாய்ப்பு குறித்த தகவல்கள் வெளியாகியுள்ளன. அது 3 சதவீத ஒதுக்கீடு அடிப்படையில் வழங்கப்படுவதாகும். ஒலிம்பிக்கில் வெற்றி பெற்றவா்களுக்கு குரூப்-1 நிலையிலான பணி வாய்ப்பு வழங்கப்படும்.

அந்த விவரம் தனி பட்டியலாக வெளியாகும். அப்போது, வீரா்களிடம் விரும்பும் பதவிகள் குறித்து அரசு கேட்கும். தற்போதைய நிலையில் அது பற்றிய முழுமையான விவரம் தெரியவில்லை. படிப்பை முழுமையாக நிறைவு செய்யாத நிலையில், எந்தப் பணியில் ஆா்வம் என்பதை எவ்வாறு கூற முடியும் என்றாா்.