திருவள்ளூர் அருகே பூண்டி ஏரியில் மழைநீர் வரத்துக்குறைவால் 8,500 கன அடியாக உபரி நீர் திறப்பு குறைக்கப்பட்டுள்ளதாக நீர்வளத்துறை அதிகாரிகள் தெரிவித்தனர்.
திருவள்ளூர் மாவட்டத்தில் கடந்த சில நாள்களாக பரவலாக கனமழை பெய்து வந்ததால் சென்னைக்கு குடிநீர் வழங்கும் ஏரிகளின் நீர்மட்டம் உயர்ந்தது. இதனால் பூண்டி ஏரி கடந்த 5 நாள்களுக்கு முன்பு முழுக் கொள்ளளவை எட்டியது. அப்போது, ஏரியின் பாதுகாப்பு கருதி முதல் கட்டமாக 1,000 கன அடி உபரி நீர் திறந்து விடப்பட்டது.
தொடர்ந்து ஏரிக்கான நீர்ப்பிடிப்பு பகுதியில் மழை நீர், கிருஷ்ணா நீர் வரத்து 16500 கனஅடியாக உயர்ந்ததால் கடந்த 4 நாள்களுக்கு முன்பு படிப்படியாக 16500 கனஅடி உபரி நீர் திறப்பு அதிகரிக்கப்பட்டது. இதனால் கொசஸ்தலை ஆற்றில் வெள்ளப்பெருக்கு ஏற்பட்டது. அதனால் கரையோர கிராமங்களைச் சேர்ந்தவர்களுக்கு வெள்ள அபாய எச்சரிக்கையும் விடப்பட்டது.
அரசு சொத்தை விலை பேசினேனா? இயக்குநர் விக்னேஷ் சிவன் விளக்கம்
இந்த நிலையில் பூண்டி ஏரி 35 அடி உயரமும், 3,231 மில்லியன் கனஅடி கொள்ளளவு கொண்டதாகும். தற்போது திங்கள்கிழமை காலை நிலவரப்படி 33 அடி உயரமும், 2,521 மில்லியன் கன அடி நீர் இருப்புள்ளது. மேலும், கடந்த 4 நாள்களாக மழை பெய்யாத நிலையில் ஏரிக்கான நீர்ப்பிடிப்பு பகுதியில் மழை நீர் வரத்து 7320 கன அடியாக குறைந்தது. அதனால், இந்த ஏரியிலிருநது உபரி நீர் திறப்பு 8500 கன அடியாக குறைந்தது.
அதேபோல் புழல் ஏரியில் 3300 மில்லியன் கனஅடி கொள்ளளவில், 2854 மில்லியன் கன அடி இருப்புள்ளது. மேலும் மழை நீர் வரத்து 550 ஆக குறைந்ததால், உபரிநீர் திறப்பு 1209 கன அடியாக குறைக்கப்பட்டுள்ளது. சோழவரம் ஏரியில் 1081 மில்லியன் கன அடியில், 0336 மில்லியன் கன அடியும், கண்ணன்கோட்டை தேர்வாய் கண்டிகை நீர்த்தேக்கத்தில் 0.500 மில்லியன் கன அடியில், 0382 மில்லியன் கன அடி கொள்ளளவு நீர் இருப்பு உள்ளது.
