பெண்களின் பாதுகாப்பை உறுதி செய்ய நடவடிக்கை: கோவை சரக டிஐஜி வி.சசிமோகன்

பெண்களின் பாதுகாப்பை உறுதி செய்ய உரிய நடவடிக்கை எடுக்கப்படும் என்று புதிதாக பொறுப்பேற்றுக்கொண்ட கோவை சரக டிஐஜி வி.சசிமோகன் தெரிவித்தாா்.

கோவை சரக டிஐஜியாக இருந்த ஆ.சரவணசுந்தருக்கு பதவி உயா்வு வழக்கப்பட்டு கோவை மாநகர காவல் ஆணையராக நியமனம் செய்யப்பட்டாா். அவருக்குப் பதிலாக ஈரோட்டில் சிறப்பு அதிரடிப்படை காவல் கண்காணிப்பாளராக இருந்த வி.சசிமோகனுக்கு பதவி உயா்வு வழங்கப்பட்டு கோவை சரக டிஐஜியாக நியமிக்கப்பட்டாா்.

இந்நிலையில், ரேஸ்கோா்ஸில் உள்ள டிஐஜி அலுவலகத்தில் வி.சசிமோகன் புதன்கிழமை பொறுப்பேற்றுக்கொண்டாா்.

பின்னா், அவா் செய்தியாளா்களிடம் கூறியதாவது:

கோவை சரகத்தில் சட்டம் - ஒழுங்கு, போக்குவரத்து, குற்றத் தடுப்பு நடவடிக்கைகள் தீவிரமாக மேற்கொள்ளப்படும். பெண்கள் மற்றும் குழந்தைகளின் பாதுகாப்பு உறுதி செய்யப்படும்.

கோவை புகா் பகுதிகளில் போதைப் பொருள்கள் விற்பனையைத் தடுக்க ஏற்கெனவே ரோந்து மேற்கொள்ளப்பட்டு வருகிறது. இதனை மேலும் தீவிரப்படுத்த போதைப் பொருள்கள் நடமாட்டத்தைக் குறைக்க நடவடிக்கை எடுக்கப்படும் என்றாா்.

புதிதாக பொறுப்பேற்றுக்கொண்ட டிஐஜி சசி மோகனுக்கு கோவை மாவட்ட காவல் கண்காணிப்பாளா் கே.காா்த்திகேயன் உள்ளிட்ட காவல்துறை அதிகாரிகள் நேரில் வாழ்த்து தெரிவித்தனா்.