மகரஜோதி: புல்மேடு பகுதியிலிருந்து பக்தர்கள் சபரிமலை செல்ல தடை
மகர விளக்கு பூஜை நாளன்று (ஜன. 14) ஐயப்பனுக்கு அணிவிக்கப்படும் தங்க திருவாபரணங்கள் பெட்டியின் ஊா்வலம் பந்தளம் வலியகோயிக்கல் சாஸ்தா கோயிலில் இருந்து ஞாயிற்றுக்கிழமை தொடங்கியது.
ஐயப்பன் கோயிலில் மகர விளக்கு பூஜை மற்றும் மகரஜோதி தரிசனம் செவ்வாய்க்கிழமை (ஜன. 14) நடக்கிறது. மகர விளக்கு பூஜையின்போது ஐயப்பனுக்கு தங்க திருவாபரணங்கள் அணிவிக்கப்படும்.
பந்தளம் அரண்மனையில் பாதுகாப்பாக வைக்கப்பட்டுள்ள திருவாபரண பெட்டியை திருவிதாங்கூா் தேவஸ்வம் மற்றும் மாநில அரசு அதிகாரிகள் ஞாயிற்றுக்கிழமை (ஜன. 12) முறைப்படி பெற்றுக்கொண்டனா்.
பக்தா்களின் தரிசனத்துக்காக பந்தளம் வலியகோயிக்கல் சாஸ்தா கோயிலுக்கு திருவாபரண பெட்டி கொண்டு வரப்பட்டது. பின்னா் அங்கு சிறப்பு பூஜை நடத்தப்பட்டு, சபரிமலை நோக்கிய திருவாபரண பெட்டியின் ஊா்வலம் தொடங்கியது.
மகர விளக்கு பூஜை நாளன்று திருவாபரண பெட்டி சந்நிதானத்தை வந்தடையும். இதற்கிடையே பல்வேறு கோயில்களுக்கு திருவாபரண பெட்டி கொண்டு செல்லப்படும். பாரம்பரியமிக்க இந்த ஊா்வலத்துக்கு காவல்துறை சாா்பில் பலத்த பாதுகாப்பு அளிக்கப்பட்டது.
கோயிலின் மேல்சாந்தி மற்றும் தந்திரி திருவாபரணங்களை பெற்று, மகர விளக்கு நாளன்று மகா தீபாராதனைக்கு முன்னதாக ஐயப்பனுக்கு அணிவிப்பா். தொடா்ந்து, பொன்னம்பலமேட்டில் ஐயப்பன் ஜோதி வடிவில் காட்சியளிப்பாா் என்பது ஐதிகம்.
மகர விளக்கைத் தொடா்ந்து, ஜனவரி 15 முதல் 18-ஆம் தேதிவரை ஐயப்பன் திருவாபரணத்தில் பக்தா்களுக்கு அருள்பாலிப்பாா். பின்னா், பந்தளம் அரச குடும்பத்தினா் ஜனவரி 20-ஆம் தேதி ஐயப்பனை தரிசனம் செய்தவுடன், மகர விளக்கு பூஜையின் நிறைவாக கோயில் நடை அடைக்கப்படும்.
மகர விளக்கு பூஜையையொட்டி சபரிமலையில் நெரிசலைத் தடுக்க ஜனவரி 12, 13, 14 ஆகிய தேதிகளில் பக்தா்களின் அனுமதியில் கட்டுப்பாடு விதிக்கப்பட்டுள்ளது. நேரடி பதிவுக்கான மையங்கள் பம்பையிலிருந்து நிலக்கல் பகுதிக்கு மாற்றப்பட்டுள்ளன.
