மழை : காரைக்கால் வாரச் சந்தை, வணிக நிறுவனங்களில் வியாபாரம் மந்தம்

காரைக்காலில் ஞாயிற்றுக்கிழமை மழை பெய்ததால், வாரச் சந்தையிலும், நகரப் பகுதி வியாபார நிறுவனங்களிலும் வியாபாரம் மந்தமானது.

காரைக்கால் பகுதியில் ஞாயிற்றுக்கிழமை காலை 11 மணியளவில் தொடங்கி சில மணி நேரம் மழை பெய்தது.

இதனால் வாரச் சந்தையில் மக்கள் அதிகளவில் காணப்படவில்லை. தீபாபளிக்கு இன்னும் 10 நாள்களே உள்ள நிலையில், ஜவுளி, மளிகைக் கடைகளிலும் பொருள்கள் வாங்க ஆட்கள் வராததால் வியாபாரிகள் கவலையடைந்துள்ளனா்.

வாரச் சந்தையில் பொருள்கள் விலையில் பெரிய அளவில் ஏற்ற இறக்கம் காணப்படவில்லை. கடந்த செப்டம்பா் முதல் வாரத்தில் தக்காளி கிலோ ரூ. 20 விற்றது, தற்போது கிலோ ரூ. 50-க்கும், பல்லாரி வெங்காயம் கிலோ ரூ.20, உருளைக்கிழங்கு கிலோ ரூ .45, பச்சை மிளகாய் கிலோ ரூ .80, பூண்டு கிலோ ரூ. 360, கேரட் கிலோ ரூ.80, கத்தரிக்காய் கிலோ ரூ. 60, மாங்காய் கிலோ ரூ. 70 என்ற விலையில் விற்பனை செய்யப்பட்டது. பருவமழை நீடிக்கும்போது, காய்கறிகளின் விலை குறைய வாய்ப்பில்லை என்று வியாபாரிகள் தெரிவித்தனா்.