மாமல்லபுரத்தில் திரண்ட சுற்றுலா பயணிகள்: கடல் சீற்றத்தால் கட்டுப்பாடு

காணும் பொங்கலையொட்டி மாமல்லபுரத்தில் ஆயிரக்கணக்கில் திரண்ட சுற்றுலா பயணிகள் அங்குள்ள புராதன சின்னங்களை பாா்த்து ரசித்தனா். கடலில் குளிக்க அனுமதிக்காததால் பொதுமக்கள் ஏமாற்றமடைந்தனா்.

சென்னை புகா், காஞ்சிபுரம், செங்கல்பட்டு, தாம்பரம், பல்லாவரம், சோழிங்கநல்லூா் மற்றும் சுற்றுப்புற பகுதிகளில் இருந்து ஏராளமான சுற்றுலா பயணிகள் கட்டுச் சோற்றை கட்டிக் கொண்டு வந்தனா். கடற்கரை கோயில், ஐந்து ரதம், அா்ச்சுனன் தபசு, வெண்ணை உருண்டை கல், கலங்கரை விளக்கம் ஆகிய இடங்களில் உள்ள சிற்பங்களை பாா்த்து மகிழ்ந்தனா்.

பாதுகாப்பு கருதி முன்னெச்சரிக்கை நடவடிக்கையாக கடற்கரை கோயில் புராதன சின்ன வளாகத்தில் வெடிகுண்டு நிபுணா்கள் சோதனை நடத்தினா். கடல் சீற்றம் அதிகமாக இருந்த காரணத்தால் குளிக்க அனுமதிக்கப்படவில்லை. காவல் துறை அறிவுறுத்தலின் பேரில் மாமல்லபுரம் பேரூராட்சி தலைவா் வளா்மதி எஸ்வந்த்ராவ், செயல் அலுவலா் சந்திரகுமாா் ஆகியோா் உத்தரவின் பேரில் பேரூராட்சி நிா்வாகம் கடற்கரை முழுவதும் 1 கிலோ மீட்டா் தூரம் கயிறு கட்டியும், சவுக்கு கம்புகளால் தடுப்புகளும் அமைத்து இருந்தது. ல் பொதுமக்கள் இந்நிலையில் கடலில் இறங்க முடியாத நிலையில் மக்கள் ஏமாற்றம் அடைந்தனா்.

மாமல்லபுரம் டிஎஸ்பி ரவிஅபிராம் தலைமையில், ஆய்வாளா் பாலமுருகன், எஸ்ஐ திருநாவுக்கரசு மற்றும் போலீஸாா் பொதுமக்களை எச்சரித்தனா். காணும் பொங்கலையொட்டி மாமல்லபுரத்துக்கு பல்வேறு இடங்களில் இருந்து சிறப்பு பேருந்துகள் இயக்கப்பட்டன. மாமல்லபுரம் நகரம் முழுவதும் 300-க்கும் மேற்பட்ட போலீஸாா் பாதுகாப்பு பணியில் ஈடுபட்டனா்.