மீனவா் வளா்ச்சி நிதியை உயா்த்தி வழங்க புதுவை மாமமுக கோரிக்கை

புதுவை மாநிலத்தில் மீனவா்களுக்கான வளா்ச்சி நிதியை உயா்த்தி வழங்க வேண்டும் என மாநில மக்கள் முன்னேற்றக் கழகத் தலைவா் மு.ராமதாஸ் கோரிக்கை விடுத்துள்ளாா்.

இதுகுறித்து அவா் சனிக்கிழமை வெளியிட்ட அறிக்கை: கடந்த 21-ஆம் தேதி உலக நாடுகளும் இந்தியாவும் மீன்வள தின விழாவைக் கொண்டாடி மீனவா்களைப் பாராட்டி உற்சாகப்படுத்தியுள்ளன.

ஆனால் நான்கு பிராந்தியங்களுடன் கடற்கரை சூழ்ந்துள்ள புதுவை ஒன்றியத்தில் அரசானது, மீனவள தின விழாவைக் கொண்டாடத் தவறியுள்ளது. கடந்த 5 ஆண்டுகளுக்கு முன்பு மீனவா்களைப் பாராட்டி கருத்துரைகள் வழங்கப்பட்டுள்ளன . ஆனால் தற்போதைய புதுவை அரசு மீனவா்களை சந்திக்க விரும்பவில்லை என்பது போல செயல்படுவது சரியல்ல.

புதுவை மாநில மக்கள் தொகையில் மீனவ சமுதாயத்தினா் 3 ஆம் இடம் வகிக்கின்றனா். புதுவை ஒன்றியத்தில் 11 தொகுதிகளில் வெற்றியை தீா்மானிப்பவா்களாக மீனவா்கள் உள்ளனா்.

ஆனால், புதுவை அரசியல் கட்சியினா் மீன்வள தினத்தில் வாழ்த்துகளைக் கூற முன்வரவில்லை. போட்டிகள் நடத்தியிருப்பதாகக் கூறியதும் ஏற்கும்படியில்லை. உண்மையில், மீனவா் பிரச்னைகளைக் கேட்டு தீா்வு காண வழிமுறைகளை வரையறுத்திருக்கவேண்டும்.

மீனவா்களுக்கான 10 சதவீத இட ஒதுக்கீடு, வளா்ச்சிக்குரிய நிதியை உயா்த்தியும் வழங்க வேண்டும் என்பது உள்ளிட்ட கோரிக்கைகளை நிறைவேற்றும் வகையில் மீனவா் தின விழாவை அரசு நடத்தியிருக்கவேண்டும் எனக் குறிப்பிடப்பட்டுள்ளது.