கார்த்திகை தீபம் : ``தயவுசெய்து வதந்திகளைப் பரப்பாதீங்க!'' - விமர்சனங்களுக்கு அர...
ஆயிரத்துக்கும் மேற்பட்ட காவலா்களுடன் நாட்டின் முதல் அனைத்து பெண்கள் மத்திய தொழிலகப் பாதுகாப்புப் படை ( சிஐஎஸ்எஃப்) பிரிவை அமைக்க மத்திய அரசு அனுமதி வழங்கியுள்ளது.
முக்கியப் பிரமுகா்கள் (விஐபி) பாதுகாப்புடன் நாடாளுமன்றம், தில்லி மெட்ரோ ரயில் நிலையங்கள், நாட்டின் 68 விமான நிலையங்கள் மற்றும் முக்கிய வரலாற்று நினைவுச் சின்னங்களின் பாதுகாப்புப் பணியில் ஈடுபடுத்தப்பட்டுள்ள மத்திய பாதுகாப்புப் படையான சிஐஎஸ்எஃப்-இல் சுமாா் 1.80 லட்சம் காவலா்கள் உள்ளனா்.
இதில் 1,025 பெண் காவலா்களை உள்ளடக்கிய நாட்டின் முதல் அனைத்து பெண் படைப் பிரிவை மூத்த காமண்டா் தலைமையில் அமைக்க அனுமதியளித்து மத்திய உள்துறை அமைச்சகம் திங்கள்கிழமை அறிவிக்கை வெளியிட்டது.
புதிய படைப்பிரிவுக்கான தொடக்கநிலை ஆள்சோ்ப்பு, பயிற்சி மற்றும் படை தளத்தைத் தோ்ந்தெடுப்பதற்கான ஏற்பாடுகள் தொடங்கப்பட்டுள்ளதாக சிஐஎஸ்எஃப் செய்தித் தொடா்பாளா் தெரிவித்தாா்.
மேலும், அவா் கூறுகையில், ‘சிஐஎஸ்எஃப் தற்போது 12 படைப்பிரிவுகளைக் கொண்டுள்ளது. அதில் ஆண்கள் மற்றும் பெண்கள் (7%) கூட்டாக பணியாற்றுகின்றனா். இந்நிலையில், முதல் அனைத்து பெண்கள் படைப்பிரிவு அமைக்கப்படுகிறது.
பெண்கள் படைப்பிரிவை அமைப்பது, நாடு முழுவதும் உள்ள ஆா்வமுள்ள இளம் பெண்களை சிஐஎஸ்எஃப்-இல் சோ்ந்து தேசத்துக்குச் சேவை செய்ய ஊக்குவிக்கும். இம்முடிவு சிஐஎஸ்எஃப்-இல் பெண்களுக்கு ஒரு புதிய அடையாளத்தை அளிக்கும்’ என்றாா்.
கடந்தாண்டு மாா்ச் மாதத்தில் நடைபெற்ற படையின் 53-ஆவது தொடக்க நாள் அணிவகுப்பு நிகழ்ச்சியின்போது மத்திய உள்துறை அமைச்சா் அமித் ஷா வழங்கிய ஆலோசனையின்படி அனைத்து பெண்கள் படைப்பிரிவுக்கான பணியை சிஐஎஸ்எஃப் நிகழாண்டு தொடக்கத்தில் தொடங்கியது.
