உக்ரைனுக்கு எதிரான ரஷியாவின் போரை விமர்சித்த ரஷிய சமையல்காரர் மர்மமான முறையில் உயிரிழந்து கிடந்தார்.
ரஷியாவுக்கும் உக்ரைனுக்கும் இடையில் 2022 ஆம் ஆண்டிலிருந்து போர் நடைபெற்று வருகிறது. இந்த நிலையில், உக்ரைன் மீதான ரஷியாவின் போருக்கு எதிராக, அதிபர் விளாதிமீர் புதினை ரஷிய சமையல் கலைஞர் அலெக்ஸி ஜிமின் விமர்சித்திருந்தார்.
இவர், ரஷிய தொலைக்காட்சி நிறுவனத்தில் சமையல் கலைஞராக பணிபுரிந்து வந்தார். ஆனால், ரஷிய அதிபரை விமர்சித்ததையடுத்து, அவர் தொகுத்து வழங்கிய சமையல் நிகழ்ச்சி ரத்து செய்யப்பட்டது.
இதனைத் தொடர்ந்து, அவர் இங்கிலாந்தில் சமையல் கலைஞராக வேலைபார்த்து வந்தார். இங்கிலாந்துக்கு சென்றதிலிருந்து, அவர் ரஷியாவுக்கு திரும்பவில்லை என்றும் கூறப்படுகிறது.
இதையும் படிக்க:விளையாட்டால் ஒன்றரை கோடி வேலைவாய்ப்பு!
உக்ரைனுக்கு நன்கொடை வழங்கியதால், அவருக்கும் அவர் வேலைபார்த்து வந்த உணவகத்துக்கும் அச்சுறுத்தல் வந்ததாகவும் உணவக உரிமையாளர் தெரிவித்தார்.
இந்த நிலையில், அவர் பிரிட்டன் ஆங்கிலோமேனியா என்ற புத்தகத்தை விளம்பரப்படுத்துவதற்காக செர்பியா சென்றிருந்தார்.
இதனைத் தொடர்ந்து, செர்பியாவில் ஒரு ஹோட்டலில் ஜிமின் தங்கியிருந்த நிலையில், மர்மமான முறையில் உயிரிழந்து கிடந்தார். இதனையடுத்து, அவரது மரணத்தில் எவ்விதமான சந்தேகமும் இல்லை என்று தெரிவித்த காவல்துறையினர், உடற்கூறாய்வு அறிக்கை வெளியானவுடன்தான் தெரிய வரும் என்று கூறினர்.
