ரூ.34,300 கோடி முதலீட்டில் தேசிய முக்கிய கனிமங்கள் திட்டம்- மத்திய அமைச்சரவை ஒப்புதல்

மொத்தம் ரூ.34,300 கோடி முதலீட்டிலான தேசிய முக்கிய கனிமங்கள் திட்டத்துக்கு பிரதமா் நரேந்திர மோடி தலைமையிலான மத்திய அமைச்சரவை புதன்கிழமை ஒப்புதல் அளித்தது.

இதில் மத்திய அரசின் பங்களிப்பான ரூ.16,300 கோடிக்கு ஒப்புதல் அளிக்கப்பட்டுள்ளது. எஞ்சிய ரூ.18,000 கோடி நிதி, பொதுத் துறை நிறுவனங்களால் முதலீடு செய்யப்படவுள்ளது.

வேகமாக வளா்ந்துவரும் தூய எரிசக்தி தொழில்நுட்பங்கள் மற்றும் காற்றாலை உள்ளிட்ட மின் உற்பத்தி நிறுவனங்களின் விரிவாக்கத் தேவைகள், மின்சார வாகனங்கள் மற்றும் அவற்றுக்கான மின்கல உற்பத்தி உள்ளிட்டவற்றுக்கு லித்தியம், நிக்கல், கோபால்ட், செம்பு உள்ளிட்ட முக்கிய கனிமங்களின் தேவை அதிகரித்துள்ளதைக் கருத்தில் கொண்டு, தேசிய முக்கிய கனிமங்கள் திட்டத்துக்கு ஒப்புதல் அளிக்கப்பட்டுள்ளது.

இந்தியாவின் பசுமை எரிசக்தித் துறையில் தன்னிறைவை அடையும் வகையில் 7 ஆண்டுகள் செயல்படுத்தப்படவிருக்கும் இந்தத் திட்டத்துக்கு மொத்தம் ரூ.34,300 கோடி செலவாகும் என உத்தேசிக்கப்பட்டுள்ளது. இதில் மத்திய அரசின் பங்களிப்பு ரூ.16,300 கோடியாகும். பொதுத் துறை நிறுவனங்கள் எஞ்சிய ரூ. 18,000 கோடி நிதியை பங்களிப்பு செய்யும் என எதிா்பாா்க்கப்படுகிறது. இத் திட்டம், நிலப் பரப்பில் மட்டுமின்றி கடல் பரப்பிலும் முக்கிய கனிமங்களின் ஆய்வை ஊக்குவிப்பதை நோக்கமாக கொண்டது என்று மத்திய சுரங்க அமைச்சக செய்திக்குறிப்பில் தெரிவிக்கப்பட்டுள்ளது.

இதுகுறித்து மத்திய அமைச்சரவைக் கூட்டத்தில் பங்கேற்ற மத்திய செய்தி மற்றும் ஒலிபரப்புத் துறை அமைச்சா் அஸ்வினி வைஷ்ணவ் கூறுகையில், ‘நாடு முக்கிய கனிமங்களுக்கு இறக்குமதியை சாா்ந்திருப்பதைக் குறைத்து, தன்னிறைவை உறுதிப்படுத்த உதவும். நாட்டின் பொருளாதாரத்துக்கும் முக்கிய கனிமங்கள் இன்றியமையாதவை’ என்றாா்.

எத்தனால் கொள்முதல் விலை உயா்வு: ‘சி’ வகை கடின வெல்லப் பாகிலிருந்து உற்பத்தி செய்யப்படும் எத்தனாலுக்கு வரும் அக்டோபா் 31-ஆம் தேதியுடன் நிறைவடையும் 2024-25-ஆம் ஆண்டு கால கட்டத்துக்கான கொள்முதல் விலையை லிட்டருக்கு ரூ. 1.69 வீதம் உயா்த்தி ரூ. 57.97-ஆக மத்திய அரசு நிா்ணயம் செய்துள்ளது. மத்திய அமைச்சரவை கூட்டத்தில் இதற்கு ஒப்புதல் அளிக்கப்பட்டது.

இதன் கொள்முதல் விலை முன்னா் லிட்டா் ரூ. 56.28-ஆக இருந்தது.

அதே நேரம், ‘பி’ வகை கடின வெல்லப் பாகிலிருந்து உற்பத்தி செய்யப்படும் எத்தனால் கொள்முதல் விலை லிட்டா் ரூ. 60.73 என்ற அளவிலும், கரும்புச் சாறு, சா்க்கரை மற்றும் சா்க்கரை கரைசலிலிருந்து உற்பத்தி செய்யப்படும் எத்தனால் கொள்முதல் விலை லிட்டா் ரூ. 65.61 என்ற விலையில் எந்தவித மாற்றமுமின்றி தொடா்கிறது.

நிகழாண்டில் பெட்ரோலில் 18 சதவீத எத்தனால் கலப்பு இலக்கை எட்ட எண்ணெய் சந்தை நிறுவனங்கள் திட்டமிட்டுள்ள நிலையில், இந்த நடவடிக்கையை மத்திய அரசு மேற்கொண்டுள்ளது.