வளரும் நாடுகளுக்கு ஆண்டுதோறும் 1 டிரில்லியன் டாலா் பருவநிலை நிதி -நிபுணா் குழு வலியுறுத்தல்

வளரும் நாடுகள் பருவநிலை மாற்றச் சவால்களை சமாளிக்கவும், பாரீஸ் ஒப்பந்த இலக்குகளை அடையவும், 2030-ஆம் ஆண்டுக்குள் ஆண்டுக்கு 1 டிரில்லியன் டாலரை திரட்டுவது குறித்து அஜா்பைஜானில் நடைபெறும் பருவநிலை பாதுகாப்பு (சிஓபி29) மாநாட்டில் கவனம் செலுத்தப்பட வேண்டும் என்று பருநிலை நிதி தொடா்பான உயா்நிலை நிபுணா் குழுவின் புதிய அறிக்கையில் வலியுறுத்தப்பட்டுள்ளது.

இதே கருத்தை ஜொ்மனி, கனடா, பிரான்ஸ், நெதா்லாந்து உள்ளிட்ட வளா்ந்த நாடுகள் மாநாட்டில் கடந்த 2 நாள்களுக்கு முன்பு வலியுறுத்தியது குறிப்பிடத்தக்கது.

2025-ஆம் ஆண்டுக்குப் பிறகு வளரும் நாடுகளுக்கு ஆதரவளிக்க புதிய காலநிலை நிதித் தொகுப்பை உருவாக்குவது குறித்து சிஓபி-29 பருவநிலை பாதுகாப்பு மாநாட்டில் நாடுகள் இடையே பேச்சுவாா்த்தை நடந்து வருகிறது.

இந்நிலையில், 2030-ஆம் ஆண்டுக்கு முன் வளரும் நாடுகளின் பருவநிலை பாதுகாப்பு நடவடிக்கைகளுக்கான இந்த முதலீட்டில் ஏதேனும் பற்றாக்குறை ஏற்பட்டால், அது அடுத்தடுத்த ஆண்டுகளில் கூடுதல் அழுத்தத்தை ஏற்படுத்தும்.

இப்போது போதுமான அளவு முதலீடு செய்யத் தவறினால், முக்கியமான இலக்குகளை அடைய குறுகிய கால இடைவெளியில் இன்னும் பெரிய தொகையைத் திரட்ட வேண்டியிருக்கும் என்று அறிக்கையில் எச்சரிக்கப்பட்டுள்ளது.

உலகளாவிய பருவநிலை நடவடிக்கைகளுக்கு 2030-ஆம் ஆண்டில் ஆண்டுக்கு 6.3-6.7 டிரில்லியன் டாலா் தேவைப்படும், குறிப்பாக வளா்ந்து வரும் நாடுகளுக்கு மட்டும் ஆண்டுக்கு 2.4 டிரில்லியன் டாலா் தேவைப்படும்.

அதாவது, தூய்மை ஆற்றலுக்கு 1.6 டிரில்லியன் டாலா், பருவநிலை தழுவலுக்கு 0.25 டிரில்லியன் டாலா், இழப்பு மற்றும் சேதத்துக்கு 0.25 டிரில்லியன் டாலா், நிலையான விவசாயம் மற்றும் இயற்கை மூலதனத்துக்கு 0.3 டிரில்லியன் டாலா் மற்றும் மாற்று நடவடிக்கைகளுக்கு 0.04 டிரில்லியன் டாலா் செலவிட வேண்டியிருக்கும் என்று அறிக்கையில் மதிப்பிட்பட்டுள்ளது.

இந்தியா, சீனா கோரிக்கை: பருவநிலை நிதியை வழங்குவதாக அளிக்கப்பட்ட உறுதியை நிறைவேற்றுமாறு வளா்ந்த நாடுகளை இந்தியா, சீனா, பிரேஸில், தென்னாப்பிரிக்கா ஆகிய ‘பேசிக்’ கூட்டமைப்பு நாடுகள் கேட்டுக் கொண்டன.

அஜா்பைஜானின் பாகு நகரில் ஐ.நா. வருடாந்திர பருவநிலை மாற்ற உச்சிமாநாடு வியாழக்கிழமை நான்காவது நாளை எட்டிய நிலையில், 2015 பாரீஸ் ஒப்பந்தத்தை முழுமையாகவும் திறம்படவும் செயல்படுத்த வேண்டியதன் அவசியத்தை இந்நாடுகள் மீண்டும் வலியுறுத்தின.

வளரும் நாடுகள் உள்பட அனைவரும் தங்கள் நிகர-பூஜ்ஜிய இலக்குகள் மற்றும் செயல்படுத்துதல் முயற்சிகளை மேம்படுத்துவதற்கு வளா்ந்த நாடுகள் மாநாட்டில் அழைப்பு விடுத்தன. அதேசமயம், வளா்ந்த நாடுகள் தங்களின் கடமைகளையே சரிவர நிறைவேற்றுவதில்லை என்று விமா்சனங்களை எதிா்கொள்கின்றன.