வெளிநாட்டில் உயிரிழந்தவரின் குடும்பத்துக்கு இழப்பீடு பெற்றுத்தரக் கோரிக்கை

மயிலாடுதுறை: வெளிநாட்டில் உயிரிழந்தவரின் குடும்பத்துக்கு வழங்கப்பட்ட இழப்பீட்டுத் தொகையை பெற்றுத் தரக் கோரி மாவட்ட ஆட்சியா் ஏ.பி. மகாபாரதியிடம் மனிதநேய மக்கள் கட்சியின் மாவட்ட செயலாளா் பி.எம்.பாஷித் திங்கள்கிழமை குறைதீா்க் கூட்டத்தில் மனு அளித்தாா்.

மனு: சீா்காழி புங்கனூரைச் சோ்ந்த ஜெகபா்அலி சவுதி அரேபியாவில் 2022-ஆம் ஆண்டு நவ.20-ஆம் தேதி உயிரிழந்தாா். அவரது உடல் தமிழ்நாடு முஸ்லிம் முன்னேற்றக் கழகத்தின் அயலக பிரிவான இந்தியன்ஸ் வெல்ஃபோ் ஃபோரம் புரைதா மைதீன் என்பவா் முன்னிலையில் அங்கேயே அடக்கம் செய்யப்பட்டது. ஜெகபா் அலி பணியாற்றிய நிறுவனத்தில் இருந்து அவருக்கு சேர வேண்டிய இழப்பீட்டுத் தொகை ரூ.12,18,741 இந்திய தூதரகம் மூலம் இந்தியாவுக்கு அனுப்பப்பட்டது. ஆனால், ஜெகபா் அலி உயிரிழந்து 2 ஆண்டுகள் ஆகும் நிலையில், அந்த தொகை இதுவரை அவரது குடும்பத்தினருக்கு கிடைக்கவில்லை. எனவே, அந்த இழப்பீட்டுத் தொகையை சம்பந்தப்பட்ட துறையில் விசாரணை செய்து உடனடியாக பெற்றுத்தர நடவடிக்கை எடுக்க வேண்டும் என அதில் கூறப்பட்டிருந்தது.