ஹைதராபாத்: மதுபானக் கூடத்தில் ஆபாச நடனம்... பார்ட்டி - 40 இளம்பெண்கள் உட்பட 140 பேர் கைது!

ஹைதராபாத், பஞ்சாரா ஹில்ஸ் பகுதியில் உள்ள மதுபானக் கூடத்தில் ஆபாச நடனமாடிய பல்வேறு மாநிலங்களைச் சேர்ந்த 40 இளம்பெண்கள் உள்பட மதுபோதையில் திளைத்த 140 பேரை பஞ்சாரா ஹில்ஸ் போலீஸார் கைது செய்து, மதுபானக் கூடத்துக்கும் சீல் வைத்தனர்.

ஹைதராபாத், பஞ்சாரா ஹில்ஸ் பகுதியில் ஏராளமான மதுபானக் கூடங்களும், மசாஜ் சென்டர்களும் இயங்கி வருகின்றன. இங்கு வரும் வாடிக்கையாளர்களைக் கவர்வதற்காக பல்வேறு மாநிலங்களைச் சேர்ந்த ஏராளமான இளம்பெண்களை இந்த மதுபானக் கூடங்களும், மசாஜ் சென்டர்களும் பணியில் அமர்த்தியுள்ளன.

இந்நிலையில், கடந்த சனிக்கிழமை ஹைதராபாத், பஞ்சாரா ஹில்ஸ் பகுதியில் உள்ள ஒர் தனியார மதுபானக் கூடத்தில் ஆபாச நடனத்துடன் மது விற்பனை நடைபெற்றுள்ளது. இது குறித்த தகவலறிந்த காவல் உதவி ஆணையர் வெங்கட் ரமணா தலைமையிலான போலீஸார், சம்பந்தப்பட்ட மதுபானக் கூடத்தில் அதிரடியாக நுழைந்து, ஆய்வு மேற்கொண்டனர்.

இதில், பல்வேறு மாநிலங்களைச் சேர்ந்த 40 இளம்பெண்கள் ஆபாச நடனம் ஆடிக்கொண்டிருந்தது தெரியவந்தது. இதையடுத்து, மதுபான விடுதியின் உரிமையாளர், மேலாளர், பவுன்சர்கள் மற்றும் போதையில் உற்சாகமாக நடனமாடிக் கொண்டிருந்தவர்கள் என சுமார் 140 பேரை போலீஸார் கைது செய்து, அந்த மதுபானக் கூடத்துக்கும் சீல் வைத்தனர்.

போலீஸாரின் விசாரணையில், மதுபானக் கூட நிர்வாகத்தினர் பல்வேறு மாநிலங்களில் பணிபுரியும் பெண்களின் தகவல்களை தங்களது வாடிக்கையாளர்களுக்குத் தெரிவித்து, அதில் அவர்களுக்குப் பிடித்த பெண்களைத் தேர்வு செய்து கொண்டு, தங்கள் விடுதியில் ஜோடியாக வந்து நடனமாடி, மது விருந்தில் பங்கேற்கச் செய்ய எனத் தனியாக கட்டணமே வசூலித்து, செயல்பட்டு வந்துள்ளது தெரிகிறது.

கடந்த மாதமும், இதேபோல ஹைதராபாத்தில் உள்ள 5 மதுபானக் கூடங்களில் கலால் துறை மற்றும் தெலங்கானா போதைப்பொருள் தடுப்பு பிரிவு (டி.ஜி.என்.ஏ.பி) அதிரடி சோதனை நடத்தியதில் ஜூப்லி ஹில்ஸ், பஞ்சாரா ஹில்ஸ், மாதப்பூர் மற்றும் கச்சிபௌலி ஆகிய இடங்களில் பல இளம்பெண்கள் மற்றும் போதையில் திளைத்த இளைஞர்கள் கைது செய்யப்பட்டதும், அவர்களில் 33 பேருக்கு அதிநவீன கருவிகள் கொண்டு போதைப் பொருள்கள் பயன்பாடு குறித்து பரிசோதனை செய்யப்பட்டதில், 4 பேர் தடை செய்யப்பட்ட போதைப் பொருள்களைப் பயன்படுத்தியதும் கண்டறியப்பட்டது. மேலும், மதுபானக் கூடத்தில் மது வகைகளை பரிமாறிய ஒரு நபர் 18 வயது நிறைவடையாத இளவர் என்பதும் குறிப்பிடத்தக்கது.