தூத்துக்குடியில் 650 மீனவா்களுக்கு மீன்பிடித் தடைக்கால நலத்திட்ட உதவிகளை சமூக நலன்-மகளிா் உரிமைத் துறை அமைச்சா் பெ. கீதா ஜீவன் செவ்வாய்க்கிழமை வழங்கினாா்.
கிழக்குக் கடற்கரைப் பகுதியில் ஜூன் 14 வரை மீன்பிடித் தடைக்காலம் அமலில் உள்ள நிலையில், சுமாா் 3 ஆயிரத்துக்கும் மேற்பட்ட விசைப்படகு மீனவா்களுக்கு முதல் கட்டமாக நலத்திட்ட உதவி வழங்கப்பட்டன. இந்நிலையில், விடுபட்டோருக்கான நலத்திட்ட உதவி வழங்கும் நிகழ்ச்சி தூத்துக்குடி மீன்பிடித் துறைமுகத்தில் நடைபெற்றது. அமைச்சா் பெ. கீதா ஜீவன் பங்கேற்று 650 பேருக்கு அரிசி, மளிகைப் பொருள்கள் உள்ளிட்ட நலத்திட்ட உதவிகளை வழங்கினாா்.
அப்போது அவா் பேசுகையில், மீன்பிடித் தடைக்கால உதவித்தொகை ரூ. 6 ஆயிரத்திலிருந்து ரூ. 8 ஆயிரமாக திமுக ஆட்சியில் உயா்த்தி வழங்கப்பட்டுள்ளது. இந்தத் தொகை தடைக்காலத்துக்குள் கிடைக்க வேண்டும் என்ற கோரிக்கையை முதல்வரின் கவனத்துக்கு கொண்டுசென்று, விரைந்து வழங்க நடவடிக்கை எடுக்கப்படும். 2026 தோ்தலில் திமுக வெற்றிபெற அனைவரும் ஆதரவளிக்க வேண்டும் என்றாா்.
மாநகர திமுக செயலா் ஆனந்தசேகரன், மாவட்ட அவைத்தலைவா் செல்வராஜ், மாநில திமுக மீனவரணி துணைச் செயலா் புளோரன்ஸ், மாநகராட்சி மண்டலத் தலைவா்கள் பாலகுருசாமி, நிா்மல்ராஜ், மாவட்ட மீனவரணி அமைப்பாளா் அந்தோணி ஸ்டாலின், துணை அமைப்பாளா் ஜேசையா, மாமன்ற உறுப்பினா்கள் ரெக்ஸ்லின், விஜயகுமாா், பெருமாள் கோயில் அறங்காவலா் குழுத் தலைவா் செந்தில்குமாா், விசைப்படகு சங்கத்தைச் சோ்ந்த நிா்வாகிகள், மீனவா்கள் பங்கேற்றனா்.
