Basics of Share Market 18 : 'Lumpsum', 'SIP' என்றால் என்ன?!

லம்ப்சம், எஸ்.ஐ.பி - இந்த இரண்டு வார்த்தைகளை கேட்கும்போது, ஏதோ பெரிய விஷயம் என்று நாம் நினைக்கலாம். அப்படியெல்லாம் இல்லை. எளிதாக கூறவேண்டுமானால், இரண்டுமே இரண்டு விதமான முதலீட்டு முறை. அவ்வளவு தான்.

எஸ்.ஐ.பி என்றால் மாதா மாதம் ஒரு குறிப்பிட்ட தொகையை முதலீடு செய்வதாகும். மாதம் எத்தனை ரூபாயை முதலீடு செய்ய முடியும் என்று முடிவு செய்து, நீண்ட காலத்தில் எந்தப் பங்கின் போக்கு லாபமாக இருக்கும் என்பதை கணித்து மாதா மாதம் அதே பங்கில் முதலீடு செய்வது ஆகும்.

இன்னும் தெளிவாக பார்க்கலாம்... ராஜின் துணிக்கடையின் பங்கு மதிப்பு 10 ஆண்டுகளில் பல மடங்கு உயரும் என்பதை கணித்திருக்கிறோம் என்று வைத்துக்கொள்வோம். ஆனால், மாதா மாதம் முதலீட்டிற்கு ரூ.500 தான் ஒதுக்க முடியும். இந்த நிலையில், மாதா மாதம் ரூ.500-ஐ ராஜின் துணிக்கடை பங்கில் 10 ஆண்டுகளுக்கு முதலீடு செய்வது எஸ்.ஐ.பி ஆகும்.

ஒரு வருடம் கழித்து, வருமானம் உயர்கிறது. இப்போது ரூ.1,000 முதலீடு செய்யலாம் என்றால் ரூ.500 எஸ்.ஐ.பி தொகையை உயர்த்தி ரூ.1,000 ஆக முதலீடு செய்வது ஸ்டெப் அப் எஸ்.ஐ.பி. நமது வருமானம் உயர உயர முதலீட்டு தொகையையும் அதிகரிப்பது ஸ்டெப் அப் எஸ்.ஐ.பி.

நிலம் விற்றோ, வர வேண்டிய தொகை வந்தோ - இப்படி ஒரு 'பல்க்'கான தொகை கையில் கிடைக்கிறது. இதை முதலீடு செய்து நல்ல வட்டியுடன் லாபம் பார்க்க வேண்டுமானால், பங்குச்சந்தையில் முதலீடு செய்யலாம். இப்படி மிகப்பெரிய தொகையை முதலீடு செய்வது தான் லம்ப்சம்.

திங்கட்கிழமை: போர்ட்ஃபோலியோ என்றால் என்ன...எப்படி கட்டமைக்க வேண்டும்?!