Bigg Boss Tamil 8: முன்னாள் போட்டியாளர் என்ட்ரி... ஆனால்?! - 50வது நாளில் நிகழுமா ஆச்சரியம்?

பிக்பாஸ் சீசன் 8 விஜய் டிவியில் விறுவிறுப்பாகப் போய்க் கொண்டிருக்கிறது. அர்னவ், அன்ஷிதா, தர்ஷா குப்தா, ரவீந்தர் உள்ளிட்ட பதினெட்டு போட்டியாளர்களுடன் அக்டோபர் 4-ம் தேதி தொடங்கிய நிகழ்ச்சியில் ஒரு மாத காலத்துக்குப் பின் வைல்டு கார்டு என்ட்ரி மூலம் மஞ்சரி, ராயன் முதலான ஆறு புதிய போட்டியாளர்களும் சேர்ந்துள்ளனர்.

இதுவரை நடந்த எவிக்‌ஷன் மூலம் ரவீந்தர், தர்ஷா குப்தா, சுனிதா, அர்னவ், ரியா ஆகியோர் நிகழ்ச்சியிலிருந்து வெளியேறியுள்ளனர்.

ஆரம்பத்தில் அதாவது முதல் நாளே சாச்சனாவை வெளியேற்றி அதிரடி காட்டி நிகழ்ச்சிக்கு வரவேற்பைப் பெற்றுத் தந்தார் பிக்பாஸ். ஆனால் அடுத்தடுத்த நாட்களில் நிகழ்ச்சியின் விறுவிறுப்பில் கொஞ்சம் தொய்வு  காணப்பட்டதாகத் தெரிய வந்தது. இந்நிலையில்தான் வைல்டு கார்டு என்ட்ரி நிகழ்ந்தது.

வைல்டு கார்டு என்ட்ரிக்குப் பிறகும் கூட நிகழ்ச்சியில் விறுவிறுப்பு போதவில்லை என்பதே ரசிகர்களின் கருத்தாக இருக்கிறது.

இந்தப் பின்னணியில் தான் நிகழ்ச்சி தொடங்கிய ஐம்பதாவது நாளில் ஏதாவது அதிரடியைக் காட்டலாமா என பிக்பாஸ் டீம் யோசித்து வருவதாகச் சொல்கிறார்கள்.

அடுத்த சில தினங்களில் அந்த நாள் வரவிருக்கும் நிலையில், இந்த சீசனில் எவிக்‌ஷன் மூலம் பிக்பாஸ் வீட்டிலிருந்து வெளியேறியவர்களில் ஒருவரை அப்போது மீண்டும் பிக்பாஸ் வீட்டுக்குள் அனுப்பலாமா என யோசிக்கிறார்களாம்.

முந்தைய ஒரு சீசனில் விஜய் வர்மாவை இப்படி மறுபடியும் அனுப்பியதை நினைவு கூர்ந்து இந்தத் தகவலைச் சொல்கிறனர், நிகழ்ச்சி தொடர்பான சிலர்.

முன்னதாக இந்த சீசனின் தொடக்கத்திலேயே இந்தி, தெலுங்கு பிக்பாஸ் போல முதல்முறையாக முன்னாள் போட்டியாளர்கள் சிலரும் இந்த முறை நிகழ்ச்சிக்குச் செல்லலாமெனச் சொல்லப்பட்டது.

அந்த வகையில் நடிகை மாயா, தினேஷ், விக்ரமன், பிரதீப் ஆண்டனி, ஓவியா என சிலரது பெயர்களும் கூட அடிபட்டன. ஆனால் பிரதீப், விக்ரமன் இருவரும் தங்களது திருமணத்தைக் காரணம் காட்டி அப்படி நிகழ வாய்ப்பில்லை என்று கூடச் சொன்னதாகத் தகவல்கள் வெளியாகின.

ஆனால் இந்த ஐடியாவுக்கு சேனல் மற்றும் தயாரிப்பாளர்கள் மத்தியிலேயே இரண்டு விதமான கருத்துகள் இருந்ததாகச் சொன்னார்கள். ’வித்தியாச முயற்சிதான், அதுவும் தமிழில் முதல்முறை என்பதால் நல்ல வரவேற்பு இருக்கும் என ஒரு சாராரும், ‘கேம் பத்தி நல்லா தெரிஞ்ச ஒருத்தர் மறுபடி வர்றப்ப அவரது விளையாட்டுல ஆடியன்ஸ்க்கு இண்ட்ரஸ்ட் இருக்காது, அதனால அப்படியொரு வாய்ப்பை ஒரு புதியவருக்கே தரலாம்’ என இன்னொரு தரப்பினரும் சொல்ல, முடிவு எதுவும் எட்டப் படாமல் போக, கடைசியில் அப்படியொரு என்ட்ரி நடக்கவில்லை.

இப்போது ஐம்பதாவது நாளைக் காரணம் காட்டி இதே சீசனின் முன்னாள் போட்டியாளர்களை அனுப்புகிற ஒரு ஐடியாவில் இருப்பதாகப் பேசப்படுகிறது.

அப்படி ஒரு என்ட்ரி இருக்கும்பட்சத்தில் அந்த ஜாக்பாட் யாருக்கு என்ற கேள்வியையும் நிகழ்ச்சி தொட்ர்பான ஏரியாவில் வைத்தோம்.

‘’ரவீந்தர் திரும்ப நிகழ்ச்சிக்குள் வர்றதுக்கு வாய்ப்பு ரொம்ப ரொம்பக் கம்மி. தர்ஷா குப்தா, அர்னவ் ரெண்டு பேருக்கும் வாய்ப்பு இருக்கறதாச் சொல்றாங்க. அதுலயும் அர்னவுக்கு கொஞ்சம் அதிக வாய்ப்பு இருக்கறதா தெரியுது’ என்கின்றனர் அவர்கள்.

முன்னாள் போட்டியாளர்கள் அதாவது முந்தைய சீசன்களின் போட்டியாளர்கள் எனத் தொடங்கி இப்போது அதே சீசனின் முன்னால் போட்டியாளர்கள் என வந்து நிற்கிறாராம் பிக்பாஸ்.!

அடுத்தடுத்து என்ன நடக்கும் என பொறுத்திருந்து பார்க்கலாம்..!