பழங்களும் காய்கறிகளும் நம் உடலுக்கு ஆரோக்கியம் தருபவை என்பது அறிந்ததுதான். ஆனால், அவற்றை தினசரி உணவில் எந்தளவுக்கு சேர்த்துக்கொள்ள வேண்டும் என்பது பலரும் அறியாதது. இரவு வேளைகளில் சாப்பிடுகிற ஒரு வாழைப்பழமும் சாப்பாடுத் தட்டின் ஓரத்தில் இருக்கிற ஒரு கரண்டி காய்கறிப் பொரியலுமே நாளொன்றுக்கு போதுமானவை என்றுதான் பலரும் நினைத்துக்கொண்டிருக்கிறோம். ஆனால், போதுமான அளவு காய்கறிகளும் பழங்களும் சாப்பிட்டால்தான், இதயம் உள்ளிட்ட உடலின் முக்கியமான உறுப்புகள் ஆரோக்கியமாக இருக்கும், மனிதர்களின் ஆயுள் அதிகரிக்கும் என்கின்றன ஆய்வுகள். காய்கறிகளும் பழங்களும் எவ்வளவு சாப்பிட வேண்டும் என்று டயட்டீஷியன் தாரிணி கிருஷ்ணனிடம் கேட்டோம்.
''நம் நாட்டில் காய்கறிகளையும் பழங்களையும் மிகக்குறைவாகவே சாப்பிடுகிறார்கள். `என் பசங்களுக்குக் காயே பிடிக்காது’ என்பது வருந்தத்தக்க விஷயம். `நாங்க காய்கறிகள் நல்லா சாப்பிடுவோம் மேடம்’ என்று என்னிடம் சொல்பவர்களிடம் பேசிப் பார்த்தால், நான்கு பேர் கொண்ட குடும்பத்தில் ஒரு வேளைக்கு மொத்தமாக 250 கிராம் காய்கறி மட்டுமே சமைப்பது தெரிய வரும். இது எப்படிப் போதுமானதாக இருக்கும்?
காய்கறி, பழங்கள்
நான்கு பேருக்குக் கிட்டத்தட்ட ஒரு கிலோ காய்கறி சமைத்தால்தான் சரியாக இருக்கும். காய்கறிகள் உடலுக்கு நல்லது என்கிற விழிப்புணர்வு இருப்பவர்கள்கூட, சாம்பாரில் இருக்கிற காய்கறிகளில் ஒரு கரண்டி, பொரியலில் ஒரு கரண்டி என்று சாப்பிடுவதே போதுமானது என நினைத்துக் கொண்டிருக்கிறார்கள். உங்கள் சாப்பாட்டுத் தட்டில் பாதியளவு காய்கறிகள்தான் இருக்க வேண்டும். கால் பாகம் அரிசி சாதமும், மீதமுள்ள கால் பாகம் பருப்பு அல்லது முட்டையென்று இருக்க வேண்டும். நாம் தலைகீழாகச் சாப்பிட்டுக் கொண்டிருக்கிறோம்.
வத்தல், வடகம், சிப்ஸ், பேக்கரி உணவுகள் ஆகியவற்றில் போடுகிற பணத்தைக் காய்கறிகளுக்குச் செலவழித்தால் ஆரோக்கியம் நிச்சயம். ஒருவருக்கு மாதமொன்றுக்கு அரை லிட்டர் எண்ணெயே போதுமானது. ஆனால், வறுத்த, பொரித்த உணவுகளின் மீதான அதீத விருப்பத்தால், ஒருவர் ஒரு லிட்டரையும் தாண்டி எண்ணெய் எடுத்துக்கொண்டிருக்கிறோம். எண்ணெய் வாங்கச் செலவழிக்கிற பணத்தை காய்கறி மற்றும் பழங்களில் செலவழிக்கலாம்.
பெரும்பான்மையினர் காய்கறிகளுமில்லாமல் பருப்புமில்லாமல் மாவுச்சத்தும் கொழுப்புச்சத்தும் மட்டுமே கொண்ட கலந்த சாதம், சிப்ஸுடனே சாப்பாட்டை முடித்துக்கொண்டிருக்கிறார்கள். பிரியாணியில்கூட வெறும் குஸ்காவை சாப்பிட்டால் அதன் மூலம் கிடைக்க வேண்டிய புரதம்கூட கிடைக்காது’’ என்று வருத்தப்பட்டவர், நாளொன்றுக்குச் சாப்பிட வேண்டிய காய்கறி, பழங்களுக்கான அளவுகளைக் குறிப்பிட்டார்.
`ஒரு வேளைக்கு ஒன்றரை கப் காய்கறி..'
''ஒரு நபர், ஒரு வேளைக்கு 150 கிராம் காய்கறி சாப்பிட வேண்டும். அதிலும் வெந்தவுடன் அளவில் குறைந்துவிடும் வெண்டைக்காய், நீர்க்காய்கறிகள் என்றால் 200 கிராம் சாப்பிட வேண்டும். பீன்ஸ், அவரைக்காய் போன்ற காய்கறிகள் வெந்தாலும் அளவு குறையாது என்பதால், அவற்றை 150 கிராம் சாப்பிட்டாலே போதும். கிராம் கணக்கை அளவிட்டுச் சாப்பிட முடியாது என்பவர்கள், ஒரு வேளைக்கு ஒன்றரை கப் காய்கறி சாப்பிட வேண்டும். இதை வெந்த காய்கறிகள் ஒரு கப், காய்கறி சாலட் அரை கப் என்றும் சாப்பிடலாம். சிறிதளவு காய்கறி சூப்பாகவும் அருந்தலாம்.
எந்த சீஸனல் பழமாக இருந்தாலும் நடுத்தர அளவுள்ள பழங்களை தலா ஒன்று என இரண்டு வேளை சாப்பிட வேண்டும். உதாரணத்துக்கு, கொய்யாவில் சிறியதும் இருக்கிறது பெரியதும் இருக்கிறது. அதில் நடுத்தர அளவில் இருப்பதை எடுத்துக்கொள்ளுங்கள். பப்பாளி அல்லது தர்பூசணிபோல பெரிய பழங்கள் என்றால் ஒரு வேளைக்கு ஒரு கப் எடுத்துக்கொள்ளுங்கள். நீரிழிவு பிரச்னை இருப்பவர்கள் மருத்துவரை கலந்து ஆலோசித்துவிட்டுச் சாப்பிடுங்கள்.
இப்படி காய்கறிகளும் பழங்களும் சாப்பிட்டால், வைட்டமின், தாது உப்புகள், நார்ச்சத்து இவையெல்லாம் உடலுக்குக் கிடைத்து, ஆயுள் நீளும். அதில் சந்தேகமே வேண்டாம்’’ என்கிறார் தாரிணி கிருஷ்ணன்.
