SRK: 3 மாதமாக ஷாருக்கான் வீட்டு வாசலில் காத்திருந்த ரசிகர்; செல்பி எடுத்த ஷாருக்; நெகிழ்ந்த ரசிகர்!
Admin
- 2 weeks ago
பாலிவுட் நடிகர் ஷாருக்கான் மும்பையில் கடற்கரையையொட்டிய பங்களாவில் வசித்து வருகிறார். பாந்த்ராவில் உள்ள இந்த மன்னத் பங்களாவைப் பார்க்கத் தினமும் நாடு முழுவதும் இருந்து நூற்றுக்கணக்கானோர் வந்து செல்வதுண்டு.
ஷாருக்கான் சமீபத்தில் தனது 59வது பிறந்தநாளை ரசிகர்களுடன் சேர்ந்து கொண்டாடினார். ஒவ்வொரு ஆண்டும் பிறந்தநாளன்று தனது வீட்டு பால்கனியில் நின்று ஷாருக்கான் ரசிகர்களைச் சந்திப்பது வழக்கம். ஆனால் இந்த ஆண்டு அவ்வாறு சந்திக்கவில்லை. ஷாருக்கானை பார்க்க அவரது ரசிகர் ஷேக் மொகமத் அன்சாரி ஜார்க்கண்ட் மாநிலத்திலிருந்து வந்து கடந்த 95 நாட்களாக ஷாருக்கான் வீட்டிற்கு வெளியில் காத்திருந்தார். அந்த ரசிகர் சொந்த ஊரில் கம்ப்யூட்டர் சென்டர் ஒன்றை நடத்தி வந்தார். கம்ப்யூட்டர் சென்டரை மூடிவிட்டு ஷாருக்கானை பார்க்கவேண்டும் என்பதற்காக மும்பை வந்தார். அவர் மும்பையில் ஷாருக்கான் வீட்டிற்கு வெளியில் காத்திருந்தார்.
ஒவ்வொரு நாளும் ஷாருக்கானை பார்த்துவிடலாம் என்ற நம்பிக்கையிலிருந்தார். ஆனால் 3 மாதங்களாக ஷாருக்கானை பார்க்கவே முடியவில்லை. இறுதியாக அந்த ரசிகரை ஷாருக்கான் சந்தித்துப் பேசினார். அந்த ரசிகருடன் சேர்ந்து ஷாருக்கான் புகைப்படமும் எடுத்துக்கொண்டார். ஷாருக்கான் டிசர்ட் அணிந்து பிரேஸ்லெட் அணிந்த படி வந்து அந்த ரசிகரைச் சந்தித்தார். இது தொடர்பான புகைப்படங்களை ஷாருக்கான் ரசிகர் கிளப் சோசியல் மீடியாவில் வெளியிட்டுள்ளது.
இது குறித்து ரசிகர் அன்சாரி கூறுகையில், "ஷாருக்கான் எனக்குப் பிடித்தமான ஹீரோ. அவரைச் சந்திக்க வேண்டும் என்பதற்காக எனது தொழிலை மூடிவிட்டு வந்தேன். என்னைப் பொறுத்தவரை, ஷாருக்கானைச் சந்திப்பதே இறுதி வெற்றியாக இருந்தது" என்றார். ஷாருக்கானின் பிறந்தநாளுக்கு ஏற்பாடு செய்யப்பட்ட ஒரு சிறப்பு ரசிகர் சந்திப்பின் போது ஷாருக்கானை சந்திக்க அன்சாரிக்கு அனுமதி கிடைத்தது.
சினிமா விகடனின் பிரத்யேக Whatsapp க்ரூப்
https://chat.whatsapp.com/KzgH8aPb2MI9PVttY53JpX
சினிமா தொடர்பான எக்ஸ்க்ளூசிவ் அப்டேட், அசத்தல் பேட்டிகள், டி.வி அப்டேட்கள் என எதையும் மிஸ் செய்யாமல் தெரிந்து கொள்ள...
உங்கள் வாட்ஸ் அப் மூலமே இணைந்திருங்கள் சினிமா விகடனுடன்...
