UP: மருத்துவமனையில் தீ விபத்து, 10 பச்சிளம் குழந்தைகள் பலி, 16 குழந்தைகள் காயம் - என்ன நடந்தது?

உத்தரப்பிரதேசம் மாநிலத்தில் உள்ள ஜான்சி மாவட்டத்தில் உள்ள மருத்துவமனையில் நேற்றிரவு ஏற்பட்ட தீ விபத்தில் 10 பச்சிளம் குழந்தைகள் உயிரிழந்துள்ளனர். குறைந்தது 16 குழந்தைகள் உயிருக்கு ஆபத்தான சூழலில் சிகிச்சை பெற்று வருகின்றனர்.

மகாராணி லஷ்மி பாய் மெடிக்கல் காலேஜில், பிறந்த குழந்தைகளுக்கான தீவிர சிகிச்சை மையத்தில் (neonatal intensive care unit - NICU) இரவு 10:45 மணியளவில் தீப்பற்றியதாக அதிகாரபூர்வமாக தெரிவித்துள்ளார் மாவட்ட மஜிஸ்திரேட் அவினாஷ் குமார்.

தீப்பற்றிய நாளில் NICU வார்டில் 54 குழந்தைகள் இருந்துள்ளனர், இவர்களில் 44 பேர் காப்பாற்றப்பட்டுள்ளனர். உயிரிழந்த குழந்தைகளில் 7 பேரின் சடலங்கள் மட்டுமே உடனடியாக அடையாளம் காண முடிந்துள்ளது. மற்ற சடலங்களை அடையாளம் காண டி.என்.ஏ டெஸ்ட் மேற்கொள்ளப்படலாம் என்கின்றனர்.

உயிருடன் மீட்கப்பட்ட குழந்தைகளின் பெற்றோரும் உறவினர்களும் குழந்தைகளைப் பார்ப்பதற்கு அனுமதிக்கப்படவில்லை. இதனால் மருத்துவமனை முன்னிலையில் போராட்டத்தில் ஈடுபட, சலசலப்பு ஏற்பட்டுள்ளது. குழந்தைகளின் உறவினர்கள் சாலையில் அமர்ந்து போராடி வருகின்றனர்.

உத்தரப்பிரதேச துணை முதல்வர் ப்ரஜேஷ் பதக், ஆக்ஸிஜன் செறிவூட்டியில் ஏற்பட்ட ஷார்ட்-சர்க்யூட் தான் தீ விபத்துக்கு காரணம் எனக் கூறியுள்ளார்.

மூத்த காவல் கண்காணிப்பளர் சுதா சிங், 16 குழந்தைகள் உள்ளூர் மருத்துவமனைகளில் அனுமதிக்கப்பட்டு சிகிச்சை பெறுவதாகவும், அவர்களது உயிரைக் காக்க அனைத்து நடவடிக்கைகளும் மேற்கொள்ளப்படுவதாகவும் தெரிவித்துள்ளார்.

மருத்துவமனையில் தீ பிடிக்கும்போது எழ வேண்டிய அபாய ஒலி வேலை செய்யவில்லை என்று கூறப்படும் விமர்சனங்களை அரசு மறுத்துள்ளது.

உயிரிழந்த குழந்தைகளின் குடும்பங்களுக்கு 5 லட்சமும் காயமடைந்துள்ள குடும்பங்களின் குழந்தைகளுக்கு 50,000-ம் இழப்பீடாக வழங்க உத்தரவிட்டுள்ளார் யோகி ஆதித்யநாத். பிரதமர் மோடி உயிரிழந்த குழந்தைகளின் குடும்பத்தினருக்கு 2 லட்சமும் காயமடைந்தவர்களின் குடும்பத்துக்கு 50, 000ம் பிரதமரின் தேசிய நிவாரண நிதியிலிருந்து அளிக்க உத்தரவிட்டுள்ளார்.