அரசு பேருந்து ஓட்டுநரை தாக்க முயற்சி: வெளிமாநில ஓட்டுநா்களிடம் விசாரணை

நாமக்கல் மாவட்டம், கீரம்பூா் அருகே அரசு பேருந்து ஓட்டுநரை ஆயுதங்களால் தாக்க முயன்ற வெளிமாநில லாரி ஓட்டுநா்களை பயணிகளும், பொதுமக்கள் பிடித்து பரமத்தி காவல் துறையினரிடம் ஒப்படைத்தனா்.

நாமக்கல் மாவட்டம், கீரம்பூரை அடுத்த ராசாம்பாளையம் சுங்கச் சாவடி அருகே கரூரில் இருந்து வெளிமாநில லாரியும், சேலம் நோக்கி அரசுப் பேருந்தும் தேசிய நெடுஞ்சாலையில் வந்தன.

அப்போது லாரியை அரசுப் பேருந்து முந்தி சென்றபோது லாரியின் கதவு திடீரென திறந்துள்ளது. இதைப் பாா்த்த அரசுப் பேருந்து ஓட்டுநா் லாரி மீது மோதி விடாமல் பேருந்து இயக்கியதால் விபத்து தவிா்க்கப்பட்டது.

பின்னா் பேருந்தை சாலையோரம் நிறுத்திவிட்டு பின்னால் வந்த லாரியை நிறுத்தி லாரியின் கதவு திறக்கப்பட்டது குறித்து பேருந்து ஓட்டுநா் கூறியுள்ளாா். அப்போது லாரியில் இருந்த வெளிமாநிலத்தைச் சோ்ந்த ஓட்டுநா்கள் இருவா் திடீரென கீழே இறங்கி லாரியில் இருந்த ஆயுதங்களால் அரசு பேருந்து ஓட்டுநரைக் தாக்க முயன்றனா்.

இதைப் பாா்த்த பேருந்தில் இருந்த பயணிகள் வெளிமாநில லாரி ஓட்டுநா்களிடம் இருந்து ஆயுதங்களை பறித்து அவா்கள் இருவரையும் தாக்கி கைகளை கட்டிவைத்து பரமத்தி காவல் துறையினருக்கு தகவல் தெரிவித்தனா். நிகழ்விடம் வந்த பரமத்தி போலீஸாா் ஆயுதங்களை பறிமுதல் செய்து வெளிமாநில ஓட்டுநா்கள் இருவரையும் காவல் நிலையத்துக்கு அழைத்து வந்து விசாரணை நடத்தி வருகின்றனா்.