ரூ. 10.58 கோடியில் ராசிபுரம் நகர புதிய பேருந்து நிலையம் அமைக்கும் பணி: அமைச்சா், எம்.பி., பங்கேற்பு

கலைஞா் நகா்ப்புற மேம்பாட்டுத் திட்டத்தின் கீழ் ரூ. 10.58 கோடி மதிப்பீட்டில் ராசிபுரம் நகர புதிய பேருந்து நிலையம் அமைக்கும் பணிக்கு அடிக்கல் நாட்டு விழா ஞாயிற்றுக்கிழமை நடைபெற்றது.

ராசிபுரம் நகரப் பகுதியில் போக்குவரத்து நெரிசல், கட்டடங்கள் அதிகரிப்பு, வாகனம், மக்கள்தொகை பெருக்கம் ஆகியவற்றை கருத்தில் கொண்டு ராசிபுரம் நகரப் பேருந்து நிலையத்தை இடம் மாற்ற முடிவு செய்யப்பட்டது.

இதையடுத்து ராசிபுரம் அருகே உள்ள அணைப்பாளையம் பகுதியில் புதிய பேருந்து நிலையம் அமைக்க இடம் தோ்வு செய்யப்பட்டது. பேருந்து நிலையத்துக்கு தனியாரிடம் ரூ. 7.02 ஏக்கா் நிலம் தானமாகப் பெறப்பட்டது.

தொடா்ந்து கலைஞா் நகா்ப்புற மேம்பாட்டுத் திட்டம் 2024-25 இன் கீழ் ராசிபுரம் நகர புதிய பேருந்து நிலையம் அமைக்கும் பணிக்கு ரூ. 10.58 கோடி நிதி ஒதுக்கீடு செய்து, அரசாணை வெளியிடப்பட்டது. அதனடிப்படையில் இதற்கான ஒப்பந்தம் விடப்பட்டு, பேருந்து நிலையம் அமைக்கும் பணிக்கு அடிக்கல் நாட்டி பணிகள் தொடங்கப்பட்டன.

நாமக்கல் மாவட்ட வருவாய் அலுவலா் ரெ.சுமன் தலைமையில் நடைபெற்ற விழாவில், ஆதிதிராவிடா், பழங்குடியினா் நலத் துறை அமைச்சா் மா.மதிவேந்தன், நாமக்கல் மாவட்ட மத்திய கூட்டுறவு வங்கித் தலைவரும், மாநிலங்களவை உறுப்பினருமான கே.ஆா்.என்.ராஜேஸ்குமாா் ஆகியோா் பூமிபூஜையில் பங்கேற்று அடிக்கல் நாட்டி பேருந்து நிலையத்திற்கான பணிகளைத் தொடங்கி வைத்தனா்.

புதிய பேருந்து நிலையமானது 52 கடைகள், 30 பேருந்துகள் நிறுத்துமிடம், 2 உணவு விடுதிகள், இருசக்கர வாகனம் நிறுத்துமிடம் - 1, நான்கு சக்கர வாகனம் நிறுத்துமிடம் - 1, நேரம் காப்பாளா் அறை - 1, காவலா் அறை - 1, தாய்மாா்கள் பாலுட்டும் அறை -1 உள்ளிட்ட வசதிகளுடன் அமைக்கப்படவுள்ளது. பேருந்து நிலையத்தின் மொத்த பரப்பளவு 28,455 சதுர மீட்டா், தற்போது 16,200 சதுர மீட்டா் பரப்பளவு இடத்தில் பேருந்து நிலையம் கட்டப்படவுள்ளது.

நிகழ்ச்சியில் ராசிபுரம் நகா்மன்ற தலைவா் ஆா்.கவிதா சங்கா், முன்னாள் எம்எல்ஏ கே.பி.ராமசாமி, ராசிபுரம் நகராட்சி ஆணையாளா் சு.கணேசன், வட்டாட்சியா் எஸ்.சரவணன், நகர திமுக செயலாளா் என்.ஆா்.சங்கா் உள்ளிட்ட நகா்மன்ற உறுப்பினா்கள், அரசு அலுவலா்கள் பங்கேற்றனா்.