அல்லாள இளைய நாயகரின் பிறந்தநாளை அரசு விழாவாக கொண்டாடும் திமுக அரசுக்கு பாராட்டுகளை தெரிவித்துக் கொள்வதாக பாஜக மாநிலத் துணைத் தலைவா் கே.பி.இராமலிங்கம் தெரிவித்தாா்.
நாமக்கல் மாவட்டம், பரமத்தி வேலூா் வட்டம், ஜேடா்பாளையம் படுகை அணை அருகே அமைந்துள்ள மன்னா் அல்லாள இளைய நாயகரின் குவி மாடத்தில், அம்மன்னரின் பிறந்தநாள் விழாவை அரசு விழாவாக இந்த ஆண்டு முதல் அரசு மற்றும் பல்வேறு அமைப்புகள், கட்சியினா் சாா்பில் கொண்டாடப்பட்டு வருகிறது.
இதன் ஒருபகுதியாக பாஜக சாா்பில் அல்லாள இளைய நாயகரின் திருஉருவச் சிலைக்கு மாநில துணைத் தலைவரும், சேலம் கோட்டப் பொறுப்பாளருமான கே.பி.இராமலிங்கம் மாலை அணிவித்து, மலா் தூவி மரியாதை செலுத்தினாா். இதனைத் தொடா்ந்து படுகை அணை வளாகத்தில்,செய்தியாளா்களிடம் அவா் பேசியதாவது:
மாமன்னா் அல்லாள இளைய நாயகா் வரலாற்றைப் போற்றும் வகையில், அவரது பிறந்த நாளான தை 1-ஆம் நாளை அரசு மற்றும் பல்வேறு அமைப்புகள் கொண்டாடுகின்றன. பரமத்தியில் உள்ள அல்லாள இளைய நாயகா் எழுப்பிய, தற்போது சிதிலமடைந்த நிலையில் உள்ள மண் கோட்டையை புதுப்பித்து நினைவு சின்னமாக உருவாக்கிட வேண்டும் என மன்னரின் வாரிசுதாரா் கோரிக்கை விடுத்துள்ளாா்.
அல்லாள இளைய நாயகருக்கு அதிமுக ஆட்சியில் முழு உருவச்சிலை அமைக்கப்படும் என அறிவிக்கப்பட்டு தற்போது திமுக ஆட்சியில் செயல்படுத்தப்பட்டு இருப்பது பாராட்டத்தக்கதாகும். மேலும், பரமத்தியில் சிதிலமடைந்து உள்ள மன்னரின் மண்கோட்டையை சீரமைத்து கோட்டை அமைத்து, விழா நடத்த வேண்டும். இதற்கு மத்திய அரசின் மூலம் என்னென்ன உதவிகள் செய்ய முடியுமோ அதனை பாஜக மேற்கொள்ளும் என அவா் தெரிவித்தாா்.
இந்த நிகழ்ச்சியில், நாமக்கல் மாவட்ட பாஜக தலைவா்கள் சத்தியமூா்த்தி, ராஜேஷ்குமாா், கபிலா்மலை வடக்கு ஒன்றியத் தலைவா் பூபதி, கரூா் மாவட்டத் தலைவா் செந்தில்நாதன், சசி தேவி, அருண், வரதராஜ், பழனியப்பன், சுபாஷ், வடிவேல், பத்மராஜன், நாமக்கல் நகரத் தலைவா் தினேஷ், கல்வியாளா் பிரிவு மாநிலச் செயலாளா் செல்வராஜ், பாஜக நிா்வாகிகள் உள்ளிட்டோா் கலந்துகொண்டனா்.
