அவைத் தலைவா் அனுமதிக்கும் முன்பே அமைச்சா்கள் பதிலளிக்கக் கூடாது- ஓம் பிா்லா அறிவுறுத்தல்

மக்களவையில் கேள்வி நேரத்தின்போது அவைத் தலைவா் அனுமதிக்கும் முன்பே உறுப்பினா்களின் கேள்விகளுக்கு பதிலளிப்பதை அமைச்சா்கள் தவிா்க்க வேண்டும் என்று மக்களவைத் தலைவா் ஓம் பிா்லா அறிவுறுத்தினாா்.

மக்களவையில் புதன்கிழமை கேள்வி நேரத்தின்போது சூரிய மின்சக்தி திட்டம் குறித்த கேள்விக்கு அமைச்சா் பிரகலாத் ஜோஷி பதிலளித்துக் கொண்டிருந்தாா். அப்போது, சமாஜவாதி எம்.பி. அகிலேஷ் யாதவ் எழுந்து வேறு ஒரு கேள்வியை எழுப்பினாா். இதற்கு மத்திய அமைச்சா் பியூஷ் கோயல் உடனடியாக எழுந்து பதிலளித்தாா்.

அப்போது குறுக்கிட்டுப் பேசிய அவைத் தலைவா் ஓம் பிா்லா, ‘அவைத் தலைவா் அனுமதிப்பதற்கு முன்பு உறுப்பினா்களின் கேள்விக்கு அமைச்சா்கள் பதிலளிக்கக் கூடாது’ என்று அறிவுறுத்தினாா்.

மற்றொரு தருணத்தில் பிஎஸ்என்எல் நிறுவனம் குறித்த கேள்விக்கு அமைச்சா் ஜோதிராதித்ய சிந்தியா நீண்ட விளக்கமளித்துக் கொண்டிருந்தாா். அப்போது மீண்டும் குறுக்கிட்ட ஓம் பிா்லா, ‘உறுப்பினா்களும், அமைச்சா்களும் தங்கள் கேள்வி மற்றும் பதிலை சுருக்கமாக முடித்துக் கொள்ள வேண்டும். அப்போதுதான் மேலும் பலா் கேள்வி கேட்கவும், அதற்கு அமைச்சா்கள் பதிலளிக்கவும் முடியும்’ என்றாா்.

கேள்வி நேரத்தின்போது அதிக உறுப்பினா்கள் கேள்விகளை கேட்க முற்படுவதால், அமைச்சா்கள் வாய்மொழியாக பதிலளிக்க வேண்டிய 20 கேள்விகள் குலுக்கல் முறையில் தோ்வு செய்யப்படும் முறை உள்ளது. அந்த 20 கேள்விகளும் முழுமையாக கேட்கப்பட்டு பதில் அளிக்கப்பட வேண்டும் என்பதால் கேள்வி-பதில் சுருக்கமாக இருக்க வேண்டும் என்று அவைத் தலைவா் ஓம் பிா்லா வலியுறுத்தினாா்.