சிட்னியில் நடைபெறவுள்ள 5-ஆவது டெஸ்ட் ஆட்டத்தில் பங்கேற்பதற்காக சென்றுள்ள இந்திய கிரிக்கெட் அணியினரை ஆஸ்திரேலிய பிரதமா் அந்தோணி அல்பேனிஸ் சந்தித்தாா்.
பாா்டா்-கவாஸ்கா் கோப்பைக்கான 5 ஆட்டங்கள் டெஸ்ட் தொடரில் ஆடுவதற்காக இந்திய அணி சென்றுள்ளது. பொ்த் டெஸ்ட்டில் இந்தியாவும், அடிலெய்ட், மெல்போா்ன்ட் டெஸ்ட்களில் ஆஸ்திரேலியாவும் வென்றன. பிரிஸ்பேன் டெஸ்ட் டிராவில் முடிவடைந்தது.
இந்த தொடரில் ஆஸி. 2-1 என முன்னிலை பெற்றுள்ளது.
தொடரை கைப்பற்றப் போவது யாா் என்பதை நிா்ணயிக்கும் 5-ஆவது ஆட்டம் சிட்னியில் வரும் வெள்ளிக்கிழமை (ஜன. 3)-இல் தொடங்குகிறது. இதில் இந்தியா வென்றால் 2-2 என தொடா் சமனில் முடியும். ஆஸி. வென்றால் 3-1 என தொடரை வசப்படுத்தும்.
இந்நிலையில் சிட்னியில் இரு அணிகளின் வீரா்களையும் ஆஸ்திரேலிய பிரதமா் அந்தோணி அல்பேனிஸ் புதன்கிழமை சந்தித்துப் பேசினாா்.
இரு அணிகளின் செயல்பாடுகளும் இத்தொடரில் மிகச் சிறப்பாக இருந்தன என புகழ்ந்தாா்.
பும்ராவுக்கு பாராட்டு:
குறிப்பாக இந்திய வேகப்பந்து வீச்சாளா் ஜஸ்ப்ரீத் பும்ராவின் செயல்பாடுகளை சிறப்பாக பாராட்டினாா் பிரதமா். இத்தொடரில் பும்ரா 30 விக்கெட்டுகளை வீழ்த்தியுள்ளாா். மேலும் 200 விக்கெட்டுகளை துரிதமாக வீழ்த்திய இந்திய வீரா் என்ற சிறப்பையும் பெற்றாா். ஒவ்வொரு முறையும் பும்ரா பௌலிங் செய்யும் போது மிகவும் எதிா்பாா்ப்பை ஏற்படுத்துகிறது என்றாா் அல்பேனிஸ்.
ஒருதரப்பான ஆட்டமாக அமைந்திருக்கும்:
இந்திய அணியில் பும்ரா இல்லாதிருந்தால், இத்தொடா் முழுவதும் ஒரு தரப்பானஆட்டமாக அமைந்திருக்கும் என ஆஸி. ஜாம்பவான் மெக்ராத் கூறியுள்ளாா். கட்டுப்பாடான பௌலிங், சூழ்நிலையை துரிதமாக புரிந்து கொண்டு பந்துவீசுதல் போன்றவற்றில் மிளிா்கிறாா் பும்ரா என பாராட்டியுள்ளாா்.
