தமிழகம் முழுவதும் அதிமுக பொதுச் செயலாளர் எடப்பாடி பழனிசாமி சுற்றுப்பயணம் மேற்கொள்ளவுள்ளதாக அறிவிக்கப்பட்ட சில நிமிடங்களிலேயே ஒத்திவைக்கப்படுவதாக தெரிவிக்கப்பட்டுள்ளது.
அடுத்தாண்டு நடைபெறவுள்ள தமிழக சட்டப்பேரவைத் தேர்தலை எதிர்கொள்ள அரசியல் கட்சிகள் தயாராகி வருகின்றனர்.
நடிகர் விஜய்யின் தவெகவும் சட்டப்பேரவைத் தேர்தலில் போட்டியிடும் என்று அறிவித்துள்ளதால் நான்குமுனைப் போட்டிகள் நிலவும் என்று எதிர்பார்க்கப்படுகிறது.
இதையும் படிக்க : ஜன. 31 முதல் 234 தொகுதிகளிலும் இபிஎஸ் சுற்றுப்பயணம்!
இந்த நிலையில், கோவை அதிமுக நிர்வாகிகள் கூட்டத்தில் பேசிய கட்சியின் தலைமை நிலையச் செயலாளர் எஸ்.பி. வேலுமணி, அனைத்து தொகுதிகளுக்கும் சுற்றுப் பயணம் மேற்கொண்டு மக்களின் குறைகளை எடப்பாடி பழனிசாமி கேட்டறியவுள்ளதாக இன்று அறிவித்தார்.
மேலும், ஜனவரி 31 ஆம் தேதி கோவையிலிருந்து இந்தப் பயணம் தொடங்கவுள்ளதாகவும் தெரிவித்திருந்தார்.
இதனிடையே, அதே மேடையில் சற்று நேரத்தில் எடப்பாடி பழனிசாமியின் சுற்றுப்பயணம் 10 நாள்கள் ஒத்திவைக்கப்படுவதாகவும், பிப்ரவரி 9ஆம் தேதி தொடங்கும் என்றும் வேலுமணி தெரிவித்தார்.
