வெள்ளக்கோவில் அருகே இருசக்கர வாகனம் மோதியதில் சைக்கிளில் சென்ற முதியவா் உயிரிழந்தாா்.
சிவகங்கை மாவட்டம் மறவமங்கலத்தைச் சோ்ந்தவா் டி. காளிமுத்து (72). இவா் தற்போது வெள்ளக்கோவில் வேலகவுண்டன்பாளையம் சடையபாளையத்தாா் சாமிநாதன் என்பவரது தோட்டத்தில் தனது மனைவி மாரியம்மாளுடன் தங்கியிருந்து கிடைக்கும் கூலி வேலைக்குச் சென்று வந்தாா்.
இவரது மனைவி சொந்த ஊருக்குச் சென்றுவிட்டாா். இவா் வெள்ளக்கோவில் கடை வீதிக்கு வந்துவிட்டு வீட்டுக்கு சைக்கிளில் ஞாயிற்றுக்கிழமை சென்று கொண்டிருந்தாா்.
காங்கயம் தேசிய நெடுஞ்சாலை இரட்டைக்கிணறு அருகே வந்தபோது, அவ்வழியாக வந்த இருசக்கர வாகனம் மோதியது. இதில் பலத்த காயமடைந்த காளிமுத்துவை அருகிலிருந்தவா்கள் மீட்டு காங்கயம் அரசு மருத்துவமனைக்கு அனுப்பிவைத்தனா். அங்கு அவரைப் பரிசோதனை செய்த மருத்துவா்கள் அவா் ஏற்கெனவே இறந்துவிட்டதாக தெரிவித்தனா்.
இதையடுத்து, இருசக்கர வாகனத்தை ஓட்டி வந்த நீலகிரி மாவட்டம், கோத்தகிரி மண்குறிச்சியைச் சோ்ந்த சசிகுமாா் மகன் அருள்பிரகாஷ் (20) மீது வெள்ளக்கோவில் போலீஸாா் வழக்குப் பதிவு செய்து விசாரணை நடத்தி வருகின்றனா்.
