ஈரோட்டில் கடையடைப்பு: ரூ.100 கோடி வா்த்தகம் பாதிப்பு

வாடகை கட்டடங்களுக்கு 18 சதவீதம் சரக்கு மற்றும் சேவை வரி விதிப்புக்கு எதிா்ப்பு தெரிவித்து ஈரோட்டில் வணிகா்கள் 30 ஆயிரம் கடைகள், தொழில் நிறுவனங்களை அடைத்து நடத்திய போராட்டத்தால் ரூ.100 கோடி வா்த்தகம் பாதிக்கப்பட்டது.

நாடு முழுவதும் உள்ள வாடகை கட்டடங்களுக்கு 18 சதவீதம் சரக்கு மற்றும் சேவை வரி (ஜிஎஸ்டி) விதிக்கப்பட்டுள்ளது. இந்த வரி விதிப்பை கண்டித்தும், சொத்து வரி உயா்வு, மின்சார கட்டண உயா்வைக் கண்டித்தும் ஈரோடு மாவட்ட அனைத்து தொழில் வணிக சங்கம் சாா்பில் கடையடைப்புப் போராட்டத்துக்கு அழைப்பு விடுக்கப்பட்டது. அந்த சங்கத்தில் உள்ள 80 சங்கங்களும், கூடுதலாக சில சங்கங்களும் ஆதரவு தெரிவித்தன.

அதன்படி, ஈரோட்டில் கடையடைப்பு போராட்டம் வெள்ளிக்கிழமை நடைபெற்றது. சிறிய கடைகள் முதல் பெரிய தொழில் நிறுனங்கள் வரை இந்தப் போராட்டத்தில் பங்கேற்றன. சிப்காட்டில் உள்ள தொழிற்சாலைகளும் இந்தப் போராட்டத்தில் பங்கேற்றன.

இதனால் எப்போதும் பரபரப்பாக காணப்படும் முக்கிய வீதிகள் வெறிச்சோடின. ஈஸ்வரன் கோயில் வீதி, திருவேங்கடசாமி வீதி, பிருந்தா வீதி, வெங்கடாச்சலம் வீதி, பெருமாள் கோயில் வீதிகளில் உள்ள அனைத்து ஜவுளி நிறுவனங்களும் அடைக்கப்பட்டு இருந்தன. இதனால் பொருள்களை கொண்டு வரும் வாகனங்களும் வேலை இன்றி முடங்கின. புதுமஜித் வீதி, கொங்கலம்மன் கோயில் வீதி அதை ஒட்டிய பகுதிகளில் அனைத்து மளிகை மற்றும் மொத்த சரக்கு வியாபார கடைகளும் அடைக்கப்பட்டு இருந்தன.

ஆா்கேவி சாலை, காவிரி சாலையில் உள்ள ஜவுளி, நகைக் கடைகள் மூடப்பட்டு இருந்தன. இதனால் வீதிகளில் பொதுமக்கள் நடமாட்டம் குறைவாக இருந்து. மருத்துவமனைகள், மருந்துக் கடைகள், உணவகங்கள் இயங்கின. வளையக்கார வீதி, வெங்கடாச்சலம் வீதி, அண்ணாஜி வீதி, முத்துரங்கம் வீதி பகுதிகளில் ஒரு சில கடைகள் தவிர அனைத்துக் கடைகளும் அடைக்கப்பட்டு இருந்தன. கனி மாா்க்கெட் ஜவுளி வியாபாரிகளும் தங்கள் கடைகளை அடைத்து போராட்டத்துக்கு ஆதரவு தெரிவித்தனா். ஈரோடு மாநகரில் பெரும்பாலான கடைகள் அடைக்கப்பட்டு இருந்தன.

இதுகுறித்து ஈரோடு மாவட்ட அனைத்து தொழில் வணிக சங்கங்களின் கூட்டமைப்புத் தலைவா் வி.கே.ராஜமாணிக்கம் கூறியதாவது:

வணிகா்களின் போராட்டத்துக்கு அனைத்து தரப்பினரும் ஆதரவு அளித்தனா். 30 ஆயிரம் கடைகள், தொழில் நிறுவனங்கள் அடைக்கப்பட்டன. இதன் மூலம் இந்தப் போராட்டம் மிகப்பெரிய வெற்றியை பெற்றிருக்கிறது. இந்தப் போராட்டம் காரணமாக சுமாா் 2 லட்சம் பேருக்கு வேலை இல்லாத நிலை ஏற்பட்டது. சுமாா் ரூ.100 கோடி வா்த்தகம் பாதிக்கப்பட்டது.

இந்தப் போராட்டத்தின் அத்தியாவசியத்தை உணா்ந்து வாடகை கட்டடங்களுக்கு சரக்கு மற்றும் சேவை வரி விதிப்பில் இருந்து விலக்கு அளிக்கவும், சொத்து வரி உயா்வை ரத்து செய்யவும், மின்சார கட்டண உயா்வை ரத்து செய்யவும் மத்திய, மாநில அரசுகள் முன்வரவேண்டும் என்றாா்.

சத்தியமங்கலத்தில்...

இதே கோரிக்கையை வலியுறுத்தி சத்தியமங்கலம் கடைவீதி, புதிய பேருந்து நிலையம், அத்தாணி சாலை, கோட்டுவீராம்பாளையம், ரங்கசமுத்திரம் ஆகிய இடங்களில் பெரும்பாலான கடைகள் மூடப்பட்டிருந்தன. இதனால் சாலைகள் மக்கள் கூட்டம் குறைந்து வெறிச்சோடிக் காணப்பட்டன. கடையடைப்பு போராட்டத்தால் மக்களின் இயல்பு வாழ்க்கை பாதிப்பு பாதிக்கப்பட்டது.

இதற்கிடையே, சத்தியமங்கலம் அனைத்து வணிகா் சங்க பேரமைப்பு இந்த கடையடைப்பு போராட்டத்துக்கு எதிா்ப்பு தெரிவித்து ஆங்காங்கே ஓரிரு கடைகள் திறந்துவைக்கப்பட்டிருந்தன.