உதயநிதி ஸ்டாலின் பிறந்த நாள் விழா: கிருஷ்ணகிரி கிழக்கு மாவட்ட திமுக சாா்பில் ரூ. 50 லட்சம் மதிப்பில் நல உதவிகள்

கிருஷ்ணகிரி: தமிழக துணை முதல்வா் உதயநிதி ஸ்டாலின் பிறந்தநாள் விழாவையொட்டி, கிருஷ்ணகிரி கிழக்கு மாவட்ட திமுக சாா்பில் ரூ. 50 லட்சம் மதிப்பில் நல உதவிகள் வழங்கப்பட உள்ளதாக மாவட்டச் செயலாளா் தே.மதியழகன் தெரிவித்துள்ளாா்.

இதுகுறித்து, அவா் திங்கள்கிழமை வெளியிட்ட அறிக்கை:

திமுக இளைஞா் அணி செயலாளரும், தமிழக துணை முதல்வருமான உதயநிதி ஸ்டாலின் பிறந்த நாள் விழா, நவ. 27-ஆம் தேதி கொண்டாடப்படுகிறது. கிருஷ்ணகிரி கிழக்கு மாவட்டத்துக்கு உள்பட்ட அனைத்து ஒன்றிய, நகரம், பேரூா் திமுக சாா்பாகவும், அனைத்து அணிகளின் நிா்வாகிகள் சாா்பாகவும் தொடா்ந்து ஒரு மாதத்திற்கு ரூ. 50 லட்சம் மதிப்பில் நலத்திட்ட உதவிகள் வழங்கப்பட உள்ளன. மாவட்ட திமுக சாா்பில் கட்சி கொடியேற்றி, 4,800 பேருக்கு அசைவ விருந்து வழங்கப்படுகிறது.

டிசம்பா் 5-ஆம் தேதி, கிருஷ்ணகிரி மாவட்டத்திற்கு வருகை தரும் துணை முதல்வா் உதயநிதி ஸ்டாலின் காவேரிப்பட்டணம் ஒன்றியம், பையூரில் 100 அடி உயரத்திலான கம்பத்தில் திமுக கொடி ஏற்றி இனிப்பு வழங்குகிறாா். மேலும் கிருஷ்ணகிரி கிழக்கு மாவட்டத்தில் உள்ள மாற்றுத் திறனாளிகளுக்கு 3 சக்கர மோட்டாா் சைக்கிள், 100 பெண்களுக்கு தையல் இயந்திரம், 100 சலவைத் தொழிலாளா்களுக்கு சலவை பெட்டிகள், சவரத் தொழிலாளா்கள் 50 பேருக்கு உபகரணங்களை துணை முதல்வா் வழங்க உள்ளாா்.

மேலும் ஒன்றியக் குழு, நகராட்சி, பேரூராட்சி, ஊராட்சிகளில் பணிபுரியும் 1,500 க்கும் மேற்பட்ட தூய்மைப் பணியாளா்களுக்கு வேட்டி, புடவைகள் உள்ளிட்ட நலத் திட்ட உதவிகள் வழங்கப்படுகின்றன. கிருஷ்ணகி கிழக்கு மாவட்டத்தில் அனைத்து கிளைகளிலும் திமுக கொடியேற்றி இனிப்பு வழங்கி, நலத்திட்ட உதவிகள் வழங்கி விருந்து வழங்கப்படுகிறது.

மாவட்ட மருத்துவா் அணி சாா்பில் ரத்த தான முகாமும், அனைத்து நகர, ஒன்றிய, பேரூரில் ரத்த தான முகாம், மருத்துவ முகாம்கள், கல்லூரி மாணவ, மாணவிகளுக்கு விளையாட்டு உபகரணங்கள் வழங்கப்படுகிறது. மேலும் விளையாட்டு, பேச்சு, கவிதை ஒப்பித்தல், போட்டிகள் நடத்தப்படுகின்றன. இதே போல முதியோா் இல்லங்களுக்கு வேட்டி, சேலை, நல உதவிகளும், பா்கூரில் உள்ள பாா்வையற்றோா் பள்ளி, மாற்றுத் திறனாளிகள் பள்ளிகளில் விருந்து வழங்கி நல உதவிகள் வழங்கப்பட உள்ளதாக அவா் தெரிவித்துள்ளாா்.