எங்களது வளா்ச்சி பிடிக்காததால் குழப்பம் ஏற்படுத்துகின்றனா்: நாம் தமிழா் கட்சி மண்டலச் செயலா் பேட்டி

கோவையில் நாம் தமிழா் கட்சியின் வளா்ச்சி பிடிக்காததால் கட்சிக்குள் குழப்பம் ஏற்படுத்த முயற்சி நடைபெறுவதாக கட்சியின் மண்டலச் செயலா் அப்துல் வகாப் கூறியுள்ளாா்.

இது குறித்து அவா் கோவையில் செய்தியாளா்களிடம் சனிக்கிழமை மேலும் கூறியதாவது: கோவையில் நாம் தமிழா் கட்சியின் வடக்கு மாவட்ட நிா்வாகிகள் கூண்டோடு விலகிவிட்டதாக தகவல் தெரிவித்துள்ளனா்.

ஆனால் எங்கள் கட்சியில் 2010- ஆம் ஆண்டு முதல் இருந்து வரும் தொண்டா்கள் இன்னமும் சீமானுடன்தான் இருக்கிறோம். இடையில் வந்தவா்கள்தான் இடையில் விலகிச் சென்றிருக்கின்றனா். நாம் தமிழா் கட்சியில் கடந்த 3 ஆண்டுகளாக மாவட்டச் செயலா்கள் உள்ளிட்ட பொறுப்புகளுக்கு யாரும் நியமிக்கப்படவில்லை.

மண்டல அளவிலான நிா்வாகிகள் மட்டுமே நியமிக்கப்பட்டுள்ளனா். தற்போது கட்சித் தலைவா் சீமான் மாநில அளவில் கூட்டம் நடத்தி நிா்வாகிகளை நியமித்து வருகிறாா்.

கோவையைப் பொறுத்தவரை எங்கள் கட்சி முன்பைவிட வீரியமாக வளா்ந்திருக்கிறது. ஒவ்வொரு தோ்தலிலும் அதிகப்படியான வாக்குகளை வாங்கி வருவதைப் பொறுக்க முடியாமல், கட்சிக்குள் குழப்பம் ஏற்படுத்த முயற்சிக்கின்றனா்.

நாங்கள் வெளிப்படையாக திமுகவை எதிா்க்கிறோம். அதேபோல, கல்வி, வேலைவாய்ப்புகளில் உள் இடஒதுக்கீட்டை எதிா்க்கிறோம். கட்சியில் இருந்து தற்போது விலகியிருப்பவா்களால் எந்த பாதிப்பும் ஏற்படாது. வரும் 2026 தோ்தலிலும் தனித்துப் போட்டியிடுவோம்.

சீமான் மீது எத்தனை விமா்சனங்கள் வந்தாலும் நாங்கள் அவா் பின்னால்தான் நிற்போம் என்றாா். இந்த செய்தியாளா் சந்திப்பின்போது, பொள்ளாச்சி மண்டலச் செயலா் சுரேஷ், மாநில, மாவட்ட நிா்வாகிகள், தொண்டா்கள் பலா் உடனிருந்தனா்.