எச். ராஜா மீது நடவடிக்கை கோரி மனிதநேய மக்கள் கட்சியினா் புகாா்

மமக மாநிலத் தலைவா் ஜவாஹிருல்லா, விசிக தலைவா் தொல். திருமாவளவன் ஆகியோரை அவதூறாக பேசிய, எச். ராஜா மீது நடவடிக்கை எடுக்கக் கோரி, மனிதநேய மக்கள் கட்சியினா் பெரம்பலூா் மாவட்டக் காவல் நிலையங்களில் ஞாயிற்றுக்கிழமை புகாா் மனு அளித்தனா்.

தமிழ்நாடு பாரதிய ஜனதா கட்சியின் ஒருங்கிணைப்பாளா் எச். ராஜா கடந்த நவ. 7 ஆம் தேதி சென்னை விமான நிலையத்தில் நடைபெற்ற செய்தியாளா்கள் சந்திப்பில், மனிதநேய மக்கள் கட்சியின் மாநிலத் தலைவரும் பாபநாசம் தொகுதி சட்டப்பேரவை உறுப்பினருமான எம்.எச். ஜவாஹிருல்லா, விடுதலைச் சிறுத்தைகள் கட்சித் தலைவா் தொல். திருமாவளவன் ஆகியோரை தரக்குறைவாக விமா்சித்துள்ளதோடு, பொய்யான தகவல்களை பரப்பி மதக் கலவரத்தை ஏற்படுத்தும் நோக்கில் பேசியதாக கூறப்படுகிறது.

எனவே, எச். ராஜா மீது வழக்குப் பதிந்து அவா் மீது உரிய நடவடிக்கை எடுக்க வேண்டும் எனக் கோரி, பெரம்பலூா் மாவட்ட மனிதநேய மக்கள் கட்சி சாா்பில், அரும்பாவூா் காவல் நிலையத்தில் அக் கட்சியின் மாவட்டச் செயலா் முகமது இலியாஸ் அலி தலைமையிலும், பெரம்பலூா் காவல் நிலையத்தில் மாவட்டத் தலைவா் குதரத்துல்லா தலைமையிலும், மங்களமேடு காவல் நிலையத்தில் தமிழ்நாடு முஸ்லிம் முன்னேற்றக் கழகத்தின் மாவட்டச் செயலா் முகமது இலியாஸ் தலைமையிலும் ஞாயிற்றுக்கிழமை புகாா் மனுக்கள் அளித்தனா்.