எடப்பாடி கே.பழனிசாமி தமிழகத்தில் 23 மருத்துவக் கல்லூரிகளை தொடங்கி வைத்தாா்: மு.தம்பிதுரை!

தமிழகத்தில் கடந்த அதிமுக ஆட்சியில் முதல்வா் எடப்பாடி கே.பழனிசாமி 23 மருத்துவக் கல்லூரிகளை தொடங்கி வைத்து மருத்துவத் துறையில் சாதனை படைத்தாா் என முன்னாள் மக்களவை துணை சபாநாயகரும், மாநிலங்களவை உறுப்பினருமான மு.தம்பிதுரை கூறினாா்.

ஒசூா் செயின்ட் பீட்டா்ஸ் மருத்துவக் கல்லூரியில் 2024-25-ஆம் கல்வியாண்டில் பயிலும் 150 இளநிலை மருத்துவ மாணவா்களுக்கு வெள்ளை அங்கி அணிவிக்கும் நிகழ்ச்சி உள்விளையாட்டு அரங்கில் சனிக்கிழமை நடைபெற்றது. செயின்ட் பீட்டா்ஸ் மருத்துவக் கல்லூரி அறக்கட்டளைத் தலைவா் டாக்டா் பானுமதி தம்பிதுரை தலைமை வகித்தாா். இந்த நிகழ்ச்சியில் சிறப்பு விருந்தினராக கலந்துகொண்ட மு.தம்பிதுரை எம்.பி. பேசியதாவது:

தமிழ்நாட்டில் கடந்த ஆட்சியில் முதல்வராக பதவி வகித்த அதிமுக பொதுச் செயலாளா் எடப்பாடி கே.பழனிசாமி தமிழ்நாட்டில் 23 மருத்துவக் கல்லூரிகளை தொடங்கி வைத்தாா். மாவட்டத்துக்கு ஒரு மருத்துவமனை என அமைத்து சாதனை படைத்தாா். அப்போது, ஒசூரில் செயின்ட் பீட்டா்ஸ் மருத்துவக் கல்லூரி அமைக்க அனுமதி அளித்தாா்.

இந்தியாவின் முன்னேற்றத்துக்கு விவசாயம், கல்வி, சுகாதாரம் மிக முக்கியம். இந்த 3 துறைகள் முன்னேற்றம் அடைந்தால் நாடு வளா்ச்சி பெறும். மாணவா்கள் ஏதாவது ஓா் உயா்கல்வி பயின்று அறிவை வளா்த்துக் கொண்டு வாழ்வில் சிறப்பாக வாழ்வு பெற வேண்டும். மருத்துவக் கல்லூரியில் வெள்ளை அங்கி அணியும் மாணவா்கள் தங்களது பெற்றோரை மதிக்க வேண்டும். இந்தியாவில் அறிவுசாா் தொழில்நுட்ப மனிதா்கள் அதிக அளவில் ஆராய்ச்சித் துறையில் ஈடுபட வேண்டும் என்றாா்.

இந்த விழாவில் செயின்ட் பீட்டா்ஸ் மருத்துவக் கல்லூரியில் அதிக மதிப்பெண்கள் பெற்ற மாணவா்களுக்கு ரொக்கப் பரிசு, பதக்கம் வழங்கப்பட்டன.

இந்த விழாவில், அதிமுக முன்னாள் அமைச்சா் கே.சி.வீரமணி, செயின்ட் பீட்டா்ஸ் மருத்துவக் கல்லூரி தலைவா் டாக்டா் பானுமதி தம்பிதுரை, செயலாளா் டாக்டா் லாசியா தம்பிதுரை, அறங்காவலா் டாக்டா் நா்மதா தம்பிதுரை, காஞ்சி பல்கலைக்கழகத்தின் முன்னாள் துணை வேந்தா் மற்றும் பொது இயக்குநா் ஜெயசங்கரன், செயின்ட் பீட்டா்ஸ் பல்கலைக்கழகத்தின் துணை வேந்தா் மணிவண்ணன், அதியமான் பொறியியல் கல்லூரி இயக்குநா் ஜி.ரங்கநாத், நேரடி வாழ்வியல் முறை இயக்குநா் கண்ணன் கிரீஷ், மருத்துவக் கல்லூரி முதல்வா் ராஜாமுத்தையா, துணை முதல்வா் ஆனந்த ரெட்டி, இருப்பிட மருத்துவா் பாா்வதி, வேளாங்கண்ணி பள்ளிக் குழுமத்தின் தாளாளா் கூத்தரசன் உள்ளிட்டோா் கலந்துகொண்டனா்.