கடல் சீற்றத்தால் சேதமடைந்த பகுதிகளை எம்.எல்.ஏ. ஆய்வு

தேங்காய்ப்பட்டினம் மீன்பிடி துறைமுக பகுதிகளில் கடல் சீற்றத்தால் சேதமடைந்த பகுதிகளை கிள்ளியூா் எம்.எல்.ஏ. எஸ்.ராஜேஷ்குமாா் ஞாயிற்றுக்கிழமை ஆய்வு மேற்கொண்டாா்.

இனயம், தூத்தூா் என இருமண்டல மீனவா்கள் பயன்பெறும் வகையில் தேங்காய்ப்பட்டினத்தில் மீன்பிடி துறைமுகம் அமைக்கப்பட்டுள்ளது.

இங்கு முறையாக தூண்டில் வளைவுகள் அமைக்கப்படாததால் அடிக்கடி ஏற்படும் கடல் சீற்றத்தால் தேங்காய்ப்பட்டினம் கடலோர பகுதிகளை ஒட்டியுள்ள மீனவ கிராமங்களான அரையன்தோப்பு, முள்ளூா்துறை, இனயம், இனயம் புத்தன்துறை உள்ளிட்ட பகுதிகள் சேதமடைகின்றன. குறிப்பாக, கடந்த புதன்கிழமை திடீரென ஏற்பட்ட கடல் சீற்றத்தால் அரையன்தோப்பு பகுதியில் உள்ள மசூதிக்குள் கடல்நீா் புகுந்தது. மேலும், கடலோரப் பகுதிகளில் கடல் அலை தடுப்பு சுவா்கள் சேதமடைந்தன.

சேதமடைந்த பகுதிகளை கிள்ளியூா் எம்.எல்.ஏ. எஸ்.ராஜேஷ்குமாா், படகில் சென்று ஆய்வு மேற்கொண்டாா். அவருடன் தமிழ்நாடு மீனவா் காங்கிரஸ் தலைவா் ஜோா்தான், மாவட்ட மீனவா் காங்கிரஸ் தலைவா் ஜெரோம், சித்திக், பேபிஜான் உள்ளிட்ட பலா் உடனிருந்தனா்.