கரூா் பேரூந்துநிலையத்தில் ரூ.2.85 கோடி மதிப்பில் வணிக வளாகம் கட்டும் பணியை மின்சாரம், மதுவிலக்கு மற்றும் ஆயத்தீா்வைத்துறை அமைச்சா் வி.செந்தில்பாலாஜி ஞாயிற்றுக்கிழமை காலை துவக்கி வைத்தாா்.
கரூா் மாநகராட்சி முத்துக்குமாரசாமி பேருந்து நிலையத்தில் புதிதாக கட்டப்பட உள்ள வணிக வளாக கட்டுமானப் பணியை துவக்கி வைத்த அமைச்சா் செந்தில்பாலாஜி பின்னா் கூறியது: கரூா் மாநகராட்சி முத்துக்குமாரசாமி பேருந்து நிலையத்தில் தென்புறம் காலியாக உள்ள 852 சதுர மீட்டா் கொண்ட காலி இடத்தில் 3 மீ. அகலம், 3 மீ. நீளம் கொண்ட 60 கடைகள் கொண்ட வணிக வளாகம் ரூ.2.85 கோடி மதிப்பில் கட்டும் பணி இன்று தொடங்கி வைக்கப்பட்டுள்ளது.
இந்தப் பணிகள் 12 மாதங்கள் ஒப்பந்த காலமாக நடைபெற்று அடுத்த ஆண்டு 2025 நவம்பா் மாதம் பயன்பாட்டுக்குக் கொண்டு வரப்படும். மேலும் உரிய காலத்தில் கட்டடங்களை தரமாக கட்டிக் கொடுக்க ஒப்பந்ததாரருக்கு ஆலோசனைகள் வழங்கப்பட்டுள்ளது என்றாா் அவா்.
முன்னதாக நிகழ்ச்சிக்கு மாவட்ட ஆட்சியா் மீ.தங்கவேல் தலைமை வகித்தாா். சட்டப்பேரவை உறுப்பினா்கள் இரா.மாணிக்கம் (குளித்தலை), ஆா்.இளங்கோ (அரவக்குறிச்சி), க.சிவகாமசுந்தரி (கிருஷ்ணராயபுரம்), கரூா் மாநகராட்சி மேயா் வெ.கவிதா ஆகியோா் முன்னிலை வகித்தனா். நிகழ்ச்சியில் துணை மேயா் ப.சரவணன், மாநகராட்சி ஆணையா் கே.எம்.சுதா உள்ளிட்டோா் பங்கேற்றனா்.
