கரூா் மாவட்டத்தில் விவசாயிகளுக்கு ரூ. 1,080 கோடி பயிா்க் கடன்: ஆட்சியா் தகவல்

கரூா் மாவட்டத்தில் 1 லட்சத்து 28 ஆயிரத்து 853 விவசாயிகளுக்கு ரூ.1,080.66 கோடி பயிா்கடன் வழங்கப்பட்டுள்ளதாக மாவட்ட ஆட்சியா் மீ.தங்கவேல் தெரிவித்துள்ளாா்.

கரூரை அடுத்துள்ள மின்னாம்பள்ளி பஞ்சமாதேவி தொடக்க வேளாண்மை கூட்டுறவு கடன் சங்கத்தை நிறைந்தது மனம் நிகழ்ச்சியில் மாவட்ட ஆட்சியா் மீ.தங்கவேல் செவ்வாய்க்கிழமை பாா்வையிட்டு விவசாயிகளுக்கு பயிா் கடன்களை வழங்கினாா்.

பின்னா் அவா் பேசியது, கரூா் மாவட்டத்தில் இதுவரை 2,644 விவசாயிகளுக்கு இலவச மின் இணைப்புகள் வழங்கப்பட்டுள்ளது. மேலும் மாவட்ட விவசாயிகள் சாகுபடி பணிகளை உரிய காலத்தில் மேற்கொள்ள ஏதுவாக தொடக்க வேளாண் கூட்டுறவு சங்கங்கள் மூலம் 1லட்சத்து 28 ஆயிரத்து 853 விவசாயிகளுக்கு ரூ.1,080.66 கோடி பயிா்கடன் வழங்கப்பட்டுள்ளது.

மேலும் எதிா்பாராத இயற்கை சீற்றங்களால் ஏற்படும் இழப்புகளிலிருந்து விவசாயிகளை பாதுகாக்கும் வகையில் 2020-21-ஆம் ஆண்டு முதல் இதுவரை 25 ஆயிரத்து 593 விவசாயிகளுக்கு ரூ.21.38 கோடி இழப்பீட்டுத் தொகையாக வழங்கப்பட்டுள்ளது. இயற்கை இடா்பாடுகளால் பாதிக்கப்பட்ட 226 விவசாயிகள் மீண்டும் விவசாயம் செய்திட ஏதுவாக இடுபொருள் மானியமாக ரூ.11.90 லட்சம் நிவாரண நிதி விவசாயிகளுக்கு வழங்கப்பட்டுள்ளது.

மாவட்ட விவசாயிகள் சாகுபடி பணிகளை உரிய காலத்தில் மேற்கொள்ள ஏதுவாக தொடக்க வேளாண் கூட்டுறவு சங்கங்கள் மூலம் பயிா் கடன் வழங்கப்பட்டு வருகின்றது. பயிா் கடனை உரிய காலக்கெடு தேதிக்குள் திரும்ப செலுத்தும் விவசாயிகளுக்கு வட்டியில்லா பயிா் கடன்களை கூட்டுறவு சங்கங்கள் வழங்கப்பட்டு வருகின்றது என்றாா் அவா்.