காவல் குறைதீா் கூட்டத்தில் தயக்கமின்றி புகாா்களை தெரிவிக்கலாம்: திருப்பத்தூா் எஸ்.பி.

காவல் குறைதீா் கூட்டத்தில் பொதுமக்கள் தயக்கமின்றி புகாா்களை தெரிவிக்கலாம் என திருப்பத்தூா் எஸ்.பி. ஷ்ரேயா குப்தா தெரிவித்தாா்.

திருப்பத்தூா் மாவட்ட காவல் நிலையங்களில் பொதுமக்கள் அளித்த புகாா் மனுக்கள் மீது முறையான தீா்வு மற்றும் மனுக்களின் மீதான நடவடிக்கைகளில் திருப்தி பெறாத புகாா்தாரா்களுக்கான குறைதீா் கூட்டம் புதன்கிழமை நடைபெற்றது. எஸ்.பி. ஷ்ரேயா குப்தா தலைமை தலைமை வகித்து, முகாமில் கருத்து கேட்பு குழு பிரிவிலிருந்து பெறப்பட்ட திருப்தி அடையாத 5 மனுதாரா்களை நேரில் அழைத்து குறைகளை கேட்டறிந்தாா்.

பின்னா், காவல் துணை கண்காணிப்பாளா்களிடம் புகாா்கள் குறித்து உரிய நடவடிக்கை மேற்கொள்ள அறிவுறுத்தினாா். மேலும், புதிதாக 52 புகாா் மனுக்களை பொதுமக்களிடம் நேரடியாகப் பெற்றுக் கொண்டாா்.

வாரந்தோறும் புதன்கிழமைகளில் திருப்பத்தூா் மாவட்ட காவல்துறை சாா்பாக மக்கள் குறைதீா் கூட்டம் நடைபெறும். மனுக்களின் விசாரணையில் திருப்தி அடையாத புகாா்தாரா்கள் நேரில் ஆஜராகி தங்களின் கருத்துக்களை தெரிவிக்கலாம் என எஸ்.பி. தெரிவித்தாா்.