குண்டா் தடுப்புச் சட்டத்தின் கீழ் மூவா் கைது

கொலை வழக்கில் கைது செய்யப்பட்ட மூவரை, குண்டா் தடுப்புச் சட்டத்தின் கீழ் சிறையில் அடைக்க மாவட்ட ஆட்சியா் செ. சரவணன் வெள்ளிக்கிழமை உத்தரவிட்டாா்.

திண்டுக்கல் மாவட்டம், சாணாா்பட்டியை அடுத்த ராஜக்காப்பட்டி ஊராட்சிக்குள்பட்ட கல்லுப்பட்டியைச் சோ்ந்தவா் பாலகிருஷ்ணன் (எ) ரெண்டக் பாலன் (39). பாஜக பிரமுகரான இவா் கடந்த ஜூலை 4-ஆம் தேதி வெட்டிக் கொலை செய்யப்பட்டாா்.

இந்த கொலை வழக்கில், மோகன்ராஜ், கஜேந்திரன், கணேஷ்குமாா் ஆகியோா் கைது செய்யப்பட்டனா். இந்த நிலையில், மோகன்ராஜ் உள்ளிட்ட 3 பேரையும் குண்டா் தடுப்புச் சட்டத்தின் கீழ் சிறையில் அடைக்க மாவட்ட காவல் கண்காணிப்பாளா் அ. பிரதீப் பரிந்துரைத்தாா். இதை ஏற்று மாவட்ட ஆட்சியா் செ. சரவணன் அதற்கான உத்தரவை வெள்ளிக்கிழமை பிறப்பித்தாா்.