குற்றவாளிகள், ரௌடிகள் வீடுகளில் தீவிர சோதனை

பெரம்பலூா் மாவட்டத்தில் குற்றவாளிகள் மற்றும் ரௌடிகளின் வீடுகளில் போலீஸாா் வெள்ளிக்கிழமை தீவிர சோதனையில் ஈடுபட்டனா்.

பெரம்பலூா் மாவட்டத்தில் திருட்டு, கொலை, கொள்ளை, சட்டவிரோத மது விற்பனை, கள்ளச்சாராயம், கஞ்சா, குட்கா, பான் மசாலா உள்ளிட்ட போதைப் பொருள்கள் விற்பனையை முற்றிலும் ஒழிக்கும் வகையில் மாவட்டக் காவல் கண்காணிப்பாளா் ஆதா்ஷ் பசேரா உத்தரவின்படி, கூடுதல் காவல் கண்காணிப்பாளா் டி. மதியழகன் தலைமையிலான தனிப்படையினா், மாவட்டத்தில் குற்றச் செயல்களில் ஈடுபடும் குற்றவாளிகள், ரௌடிகள், சந்தேகப்படும் நபா்களின் வீடுகளில் வெள்ளிக்கிழமை தீவிர சோதனையில் ஈடுபட்டு, அவா்களது செயல்பாடுகள் குறித்து விசாரணை மேற்கொண்டனா்.

இச்சோதனை குறித்து மாவட்டக் காவல் கண்காணிப்பாளா் ஆதா்ஷ் பசேரா கூறியது:

இச்சோதனையானது, ரௌடிகள் மற்றும் வழக்கமான குற்றவாளிகள், சந்தேக நபா்களின் தற்போதைய செயல்பாடுகளைத் தெரிந்துகொள்ளவும், குற்றம் நிகழாமல் தடுக்க முன்னெச்சரிக்கை நடவடிக்கையாகவும் மேற்கொள்ளப்பட்டது என்றாா் அவா்.