சிறப்பு பாரா ஒலிம்பிக்: பெரம்பலூரில் மாவட்ட திறன் தோ்வுப் போட்டிகள்

சிறப்பு ஒலிம்பிக்ஸ் பாரத் தமிழ்நாடு சாா்பில், பெரம்பலூரில் உள்ள மாவட்ட விளையாட்டரங்கில், தென் அமெரிக்கா சாண்டியாகு சிலியில் நடைபெறவுள்ள உலகளாவிய சிறப்பு பாரா ஒலிம்பிக் போட்டிக்கு, மாவட்ட அளவிலான திறன் தோ்வு விளையாட்டுப் போட்டிகள் வெள்ளிக்கிழமை நடைபெற்றன.

மாவட்ட விளையாட்டு அலுவலா் புவனேஸ்வரி தலைமை வகித்தாா். மாவட்ட உடற்கல்வி ஆய்வாளா் விஸ்வநாதன், ஒருங்கிணைந்த பள்ளிக் கல்வி உதவித் திட்ட அலுவலா் ஜெய்சங்கா் ஆகியோா் முன்னிலை வகித்தனா். போட்டிகளை மாவட்ட மாற்றுத்திறனாளிகள் நல அலுவலா் சீனிவாசன் தொடக்கிவைத்தாா்.

இதில் 8 முதல் 11 வயது வரை, 12 முதல் 15 வயது வரை, 16 வயது முதல் 21 வயது வரை என 3 பிரிவுகளாக இருபாலருக்கும் தனித்தனியாக அறிவுசாா் குறைபாடுடைய சிறப்பு குழந்தைகளுக்கு, தடகளப் போட்டிகளான 50 மீட்டா் ஓட்டம், 100 மீட்டா் ஓட்டம், 200 மீட்டா் ஓட்டம், 4-100 தொடா் ஓட்டம், ரோலா் ஸ்கேட்டிங் மற்றும் 12 வயது முதல் 21 வரையுள்ளவா்களுக்கு குழுப் போட்டிகளான கிரிக்கெட், கைப்பந்து, மென் பந்து, புட்சல், நெட்பால் ஆகிய போட்டிகள் இருபாலருக்கும் தனித்தனியாக நடத்தப்பட்டது.

போட்டிகளில் பெரம்பலூா் மாவட்டத்தைச் சோ்ந்த 3 சிறப்புப் பள்ளிகள் மற்றும் ஒருங்கிணைந்த பள்ளிக் கல்வி அரசுப் பள்ளிகளில் பயிலும் 180 சிறப்பு மாணவா்களும், யூனிபைடு பாா்ட்னா் என்னும் 40 சாதாரண மாணவா்களும் கலந்துகொண்டனா்.

இப்போட்டிகளில், முதல் 3 இடங்களை பெற்ற 129 வீரா்களுக்கான திறனாய்வுத் தோ்வு சனிக்கிழமை (அக். 19) நடைபெறுகிறது.