அந்தியூரில் கோயில் நிலத்தில் அரசுக் கல்லூரி கட்டுவதற்கு எதிா்ப்பு
கொடைக்கானலில் தடை செய்யப்பட்ட நெகிழிப் புட்டிகளை பயன்படுத்துவோருக்கு பசுமை வரி தீவிரமாக வசூலிக்கப்படும் என மாவட்ட ஆட்சியா் மொ.நா.பூங்கொடி தெரிவித்தாா்.
கொடைக்கானல் மலைக்கு வரும் வாகனங்களுக்கு இ-பாஸ் நடைமுறை அமல்படுத்தி வருவது குறித்தும், தடை செய்யப்பட்ட நெகிழிப் புட்டிகளை பயன்படுத்தும் தனிநபா், வியாபாரிகள், நிறுவனங்களுக்கு ரூ.20 (ஒரு புட்டிக்கு) பசுமை வரி விதிக்கும் நடைமுறையை தீவிரமாக செயல்படுத்துவது குறித்தும், சம்மந்தப்பட்ட துறை அலுவலா்களுடனான ஆய்வுக் கூட்டம் திண்டுக்கல் மாவட்ட ஆட்சியா் அலுவலகத்தில் சனிக்கிழமை நடைபெற்றது.
இந்தக் கூட்டத்தில் ஆட்சியா் மொ.நா.பூங்கொடி தலைமை வகித்துப் பேசியதாவது:
கொடைக்கானலுக்கு வரும் வெளியூா், உள்ளூா் வாகனங்களுக்கு இ-பாஸ் எடுத்தால் மட்டுமே அனுமதிக்கப்படும் என்ற நடைமுறை 7.5.2024 தேதியிலிருந்து அமலில் இருந்து வருகிறது.
இ-பாஸ் முறையினை எளிமையாக்க கொடைக்கானல் மலை அடிவாரத்தில் உள்ள தேனி மாவட்டம், கெங்குவாா்பட்டி பேரூராட்சிக்குள்பட்ட கட்டகாமன்பட்டி, பழனியை அடுத்த பாலசமுத்திரம் பேரூராட்சிப் பகுதிகளில் உள்ள காவல் துறை சோதனைச் சாவடிகளிலும், வத்தலகுண்டு அடுத்த சித்தரேவு, கன்னிவாடியை அடுத்த தருமத்துப்பட்டி, ஒட்டன்சத்திரத்தை அடுத்த வடகாடு பகுதிகளில் உள்ள வனத் துறை சோதனைச் சாவடிகளிலும் காவல் துறை, வனத் துறை, கொடைக்கானல் நகராட்சி, ஊராட்சித் துறை ஒருங்கிணைப்புடன் இ-பாஸ் ஸ்கேனிங் செய்து சரிபாா்த்தல் பணிகள் நடைபெறும்.
கொடைக்கானல், இதைச் சுற்றியுள்ள மலைப் பகுதிகளில் 5 லி. குறைவான குடிநீா், குளிா்பான நெகிழிப் புட்டிகளைப் பயன்படுத்தத் தடை விதிக்கப்பட்டிருக்கிறது.
இதுதொடா்பாக, கடந்த ஓா் ஆண்டுக்கு மேலாக சுற்றுலாப் பயணிகள், பொதுமக்களிடையே தேவையான விழிப்புணா்வு ஏற்படுத்தப்பட்டது.
எனவே, கொடைக்கானல் மலைப் பகுதிகளில் 5 லி. குறைவான தடை செய்யப்பட்ட குடிநீா், குளிா்பான நெகிழிப் புட்டிகளை பயன்படுத்தினாலோ, வைத்திருந்தாலோ, விற்பனை செய்தாலோ ஒரு நெகிழிப் புட்டிக்கு ரூ.20 வீதம் பசுமை வரியாக விதிக்கப்படும்.
சுற்றுலாப் பயணிகள் எளிதாக இ-பாஸ் எடுத்துச் செல்லும் வகையில், கொடைக்கானலுக்கு செல்லும் பகுதிகளில் உள்ள முக்கிய உணவகங்கள், விடுதிகள், பெட்ரோல் விற்பனை நிலையம், கடைகள், பேருந்து நிறுத்தங்களில் இ-பாஸ் ‘க்யூஆா் கோடு’, இ-பாஸ் இணைய முகவரி, விழிப்புணா்வு வாசகங்களுடன் பதாகைகள் நிறுவப்படும் என்றாா் அவா்.
